കാളികാവ്: ഉരുള്‍പൊട്ടല്‍ ഭീതിയില്‍ ജില്ലയുടെ മലയോര ഗ്രാമങ്ങള്‍ . ദിവസങ്ങളായി തുടരുന്ന കനത്ത മഴയില്‍ തോടുകളും പുഴകളും നിറഞ്ഞു കവിഞ്ഞു. കാളികാവ്, കരുവാരക്കുണ്ട്, തുവ്വൂര്‍, ചോക്കാട്, അമരമ്പലം തുടങ്ങിയ പഞ്ചായത്തുകളിലാണ് തോടുകളും പുഴകളും നിറഞ്ഞിട്ടുള്ളത്. തിങ്കളാഴ്ച രാവിലെ മുതല്‍ പെയ്ത ശക്തമായ മഴയില്‍ പുഴകളും തോടുകളും നിറഞ്ഞത് കരകവിഞ്ഞു. കാളികാവ് ചെത്ത് കടവില്‍ പുഴ ഗതി മാറി മൈതാനത്തിലൂടെയാണ് ഒഴുകിയത്.
കാളികാവ് മങ്കുണ്ടില്‍ നിലമ്പൂര്‍-പെരുമ്പിലാവ് സംസ്ഥാന പാതയിലേക്ക് വെള്ളം കയറി. റോഡില്‍ വെള്ളം മൂടിയതിനാല്‍ രണ്ട് മണിക്കൂറിലധികം ഗതാഗത തടസമുണ്ടായി. വെന്തോടന്‍ പടിയിലെ മുത്തന്‍ തണ്ട് പാലത്തിന് മുകളിലൂടെ വെള്ളം ഒഴുകിയത് പ്രദേശത്ത് പരിഭ്രാന്തി പരത്തി. കോട്ടപ്പുഴയില്‍ മൂച്ചിക്കല്‍ കടവില്‍ വെള്ളം പാലത്തിന് മുകളിലൂടെ ഒഴുകിയതിനാല്‍ ഗതാഗതം തടസപ്പെട്ടു.
മഴ തുടര്‍ന്നാല്‍ ഉരുള്‍പൊട്ടുമെന്ന ഭീതിയിലാണ് മലയോര വാസികള്‍. കരുവാരക്കുണ്ട് കൂമ്പന്‍ മലവാരം, കാളികാവ് അടയ്ക്കാ കുണ്ട്, പോത്തന്‍കാട്, എഴുപതേക്കര്‍, ചോക്കാട്, വള്ളിപ്പൂള, കോഴിപ്ര മലവാരങ്ങളാണ് ഉരുള്‍പൊട്ടല്‍ ഭീതി നേരിടുന്നത്. ഈ മലവാരങ്ങളിലെല്ലാം മുമ്പ് ഉരുള്‍പ്പൊട്ടല്‍ ഉണ്ടായതാണ്. തോട്ടം തൊഴിലാളികളും ആദിവാസികളും ഉള്‍പടെയുള്ളവരാണ് ഈ മേഖലയില്‍ കൂടുതലും താമസിക്കുന്നത്.