തൊടുപുഴ: സര്‍ക്കാരിന് കോടികള്‍ ബാധ്യത വരുത്തുന്ന വ്യവസായ വകുപ്പിനു കീഴിലുള്ള 15 പൊതുമേഖലാ സ്പിന്നിങ് മില്ലുകളില്‍ വ്യാപക നിയമന നീക്കം. ഒരോ വര്‍ഷവും 2 കോടി മുതല്‍ 12 കോടി വരെ നഷ്ടം വരുത്തുന്ന സ്ഥാപനങ്ങളിലാണ് ഉന്നത തസ്തികകളില്‍ അടക്കം നിയമനത്തിനൊരുങ്ങുന്നത്.

കേരള സ്‌റ്റേറ്റ് ടെക്സ്റ്റയില്‍ കോര്‍പറേഷന്റെ കീഴിലുള്ള 5 മില്ലുകളിലേക്കും ആലപ്പി മില്ലിലേക്കുമാണ് കൊവിഡിനിടയില്‍ താല്‍പ്പര്യക്കാരെ നിയമിക്കാന്‍ നീക്കം നടക്കുന്നത്.അസംസ്‌കൃത വസ്തുവായ പരുത്തി, ഉല്‍പ്പന്നമായ നൂല്‍ എന്നിവ വില്‍പ്പന നടത്തുന്നില്‍ ഉന്നതങ്ങളില്‍ നടക്കുന്ന വ്യാപക അഴിമതിയും ക്രമക്കേടും കാരണമാണ് മില്ലുകള്‍ ഒരോ വര്‍ഷവും കോടികള്‍ നഷ്ടത്തിലാകുന്നതെന്ന് വിവിധ റിപ്പോര്‍ട്ടുകള്‍ ചൂണ്ടിക്കാട്ടിയിട്ടുണ്ട്.

മുംബൈയിലുള്ള ഒരു സ്വകാര്യ ഏജന്റിനു ശാഖ അനുവദിച്ച് കോടികളുടെ നൂല്‍ വര്‍ഷങ്ങളായി വില്‍പന നടത്തിയിരുന്ന കണ്ണൂര്‍ സഹകരണ മില്ലിലെ ഉത്തരവാദപ്പെട്ടവരുടെ ക്രമക്കേട് കൃത്യമായി കോഓപ്പറേറ്റീവ് ഓഡിറ്റ് റിപ്പോര്‍ട്ടില്‍ ന്യൂനത രേഖപ്പെടുത്തി രജിസ്ട്രാറായ ഹാന്റ്‌ലൂം ഡയരക്ടര്‍ക്ക് റിപ്പോര്‍ട്ട് നല്‍കിയിരുന്നു. ഉന്നത സ്വാധീനത്താല്‍ നടപടി മരവിക്കുകയായിരുന്നു.

ഗുരുതര സാമ്പത്തിക പ്രതിസന്ധി പറഞ്ഞ് നിലവില്‍ ജോലി ചെയ്യുന്ന ജീവനക്കാരുടെ പ്രെവിഡന്റ് ഫണ്ട് ഒരോ മില്ലും കോടികള്‍ അടക്കാനുണ്ട്. വൈദ്യുതി ബില്‍ ഇനത്തില്‍ 36 കോടി രൂപയോളം കുടിശിക വരുത്തിയിട്ടുണ്ട്. 18 കോടി രൂപയോളം ഗ്രാറ്റുവിറ്റി ഇനത്തില്‍ നല്‍കാനുണ്ട്.