വൈക്കം: രാഹുല്‍ ഗാന്ധി വയനാട്ടില്‍ മത്സരിക്കാന്‍ എത്തിയതോടെ യു.ഡി.എഫിന്റെ വിജയസാധ്യത പൂര്‍ണതയിലെത്തിയിരിക്കുകയാണെന്ന് കെ.പി.സി.സി മുന്‍പ്രസിഡന്റ് വി.എം സുധീരന്‍. യു.ഡി.എഫ് സ്ഥാനാര്‍ഥി തോമസ് ചാഴികാടന്റെ തെരഞ്ഞെടുപ്പ് പ്രചാരണാര്‍ഥം വെച്ചൂരില്‍ സംഘടിപ്പിച്ച പൊതുസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
കേരളത്തില്‍ ബി.ജെ.പിയെ വളര്‍ത്തി കോണ്‍ഗ്രസിനെ തളര്‍ത്തുക എന്ന പിണറായി വിജയന്റെ തന്ത്രമാണ് ശബരിമല യുവതി പ്രവേശന വിഷയം സങ്കീര്‍ണ്ണമാക്കിയത്. ശബരിമല വിഷയം ബി.ജെ.പി പത്തനംതിട്ടയിലും തിരുവനന്തപുരത്തും ആളിക്കത്തിച്ച് വിജയം നേടാന്‍ ശ്രമിക്കുന്നത് ജനാധിപത്യ കേരളത്തില്‍ നടക്കില്ല.
ജനങ്ങള്‍ക്കു മുന്നില്‍ വികസന കാര്യങ്ങളെക്കുറിച്ച് പറയുവാന്‍ കഴിയാത്ത സി.പി.എമ്മും ബി.ജെ.പിയും ജനങ്ങളെ വര്‍ഗീയമായി ഭിന്നിപ്പിക്കാന്‍ ശ്രമിക്കുകയാണെന്നും അദ്ദേഹം പറഞ്ഞു. മോദി യുഗം അവസാനിക്കുകയാണ്.
രാഹുല്‍ ഗാന്ധിയും പ്രിയങ്ക ഗാന്ധിയും ഇന്ത്യക്ക് നല്ല ഭാവിയാണ് വിളംബരം ചെയ്യുന്നത്. ഇവര്‍ തന്നെയായിരിക്കും രാജ്യത്തിന്റെ പ്രതീക്ഷകളെന്നും വി.എം സുധീരന്‍ കൂട്ടിച്ചേര്‍ത്തു.
യു.ഡി.എഫ് മണ്ഡലം ചെയര്‍മാന്‍ സണ്ണി കൊച്ചുപോട്ടയില്‍ യോഗത്തില്‍ അധ്യക്ഷനായി. സ്റ്റീഫന്‍ ജോര്‍ജ് എക്‌സ് എം.എല്‍.എ, പോള്‍സണ്‍ ജോസഫ്, അക്കരപ്പാടം ശശി, കെ.ഗിരീശന്‍, അബ്ദുല്‍ സലാം റാവുത്തര്‍, പി.എന്‍ ബാബു, അഡ്വ. എ.സനീഷ് കുമാര്‍, ജെയ്‌ജോണ്‍ പേരയില്‍, വക്കച്ചന്‍ മണ്ണത്താലി, എം.കെ ഷിബു, അഡ്വ. വി.സമ്പത്ത് കുമാര്‍, കെ.ആര്‍ ഷൈലകുമാര്‍ എന്നിവര്‍ സംസാരിച്ചു.