കൊല്ലം: ലോക്‌സഭാ മണ്ഡലം യു.ഡി.എഫ് സ്ഥാനാര്‍ഥി എന്‍.കെ പ്രേമചന്ദ്രന്റെ തെരഞ്ഞെടുപ്പ് പ്രചാരണം അവസാനഘട്ടത്തിലേക്കടുക്കുമ്പോള്‍ ശക്തമാകുന്നു. ഇന്ന് രാവിലെ പാര്‍ലമെന്റ്തല അവലോകനയോഗം ഡി.സി.സി ഓഫിസില്‍ ചേരും. വൈകിട്ട് നാലിന് എ.ഐ.സി.സി ജനറല്‍ സെക്രട്ടറി ഉമ്മന്‍ചാണ്ടി പങ്കെടുക്കുന്ന കുടുംബയോഗങ്ങള്‍ വിവിധ സ്ഥലങ്ങളില്‍ നടക്കും.
അഞ്ചിന് ഓടനാവട്ടം, ആറിന് പുനലൂരിലെ ഏരൂര്‍, ഏഴിന് കടയ്ക്കല്‍ കുമ്മിള്‍ എന്നിവിടങ്ങളിലാണ് ഉമ്മന്‍ചാണ്ടി പങ്കെടുക്കുന്നത്. ഇത് രണ്ടാം തവണയാണ് ഉമ്മന്‍ചാണ്ടിയുടെ കൊല്ലം പാര്‍ലമെന്റ് മണ്ഡലപര്യടനം. കെ.പി.സി.സി മുന്‍ പ്രസിഡന്റ് എം.എം ഹസന്‍ മണ്ഡലത്തിലെ വിവിധ സ്ഥലങ്ങളിലെ പൊതുയോഗങ്ങളില്‍ പങ്കെടുക്കും. വൈകിട്ട് അഞ്ചിന് തൃക്കരുവ, ആറിന് ചാത്തിനാംകുളം, ഏഴിന് കുളപ്പാടം എന്നിവിടങ്ങളിലാണ് ഹസന്‍ പങ്കെടുക്കുന്നത്.
ഫോര്‍വേഡ് ബ്ലോക്ക് അഖിലേന്ത്യാ ജനറല്‍ സെക്രട്ടറി ഡി. ദേവരാജന്‍ ഇന്ന് മൂന്ന് പൊതുയോഗങ്ങളില്‍ പങ്കെടുക്കും. വൈകിട്ട് നാലിന് പനയം, ആറിന് ചാത്തിനാംകുളം, ഏഴിന് നെടുമ്പന എന്നിവിടങ്ങളിലാണ് ദേവരാജന്റെ പൊതുയോഗങ്ങള്‍.
പ്രചാരണത്തിന്റെ ഭാഗമായി കഴിഞ്ഞ ദിവസങ്ങളില്‍ കോണ്‍ഗ്രസ് പ്രവര്‍ത്തകസമിതി അംഗം എ.കെ ആന്റണി പുനലൂരും കണ്ണനല്ലൂരും ചവറ ഇടപ്പള്ളിക്കോട്ടയിലും പൊതുയോഗങ്ങളില്‍ സംസാരിച്ചിരുന്നു. എ.ഐ.സി.സി വക്താവ് ഖുശ്ബു ഇതിനകം രണ്ട് യോഗങ്ങളില്‍ പങ്കെടുത്തിരുന്നു. മുസ്‌ലിം ലീഗ് നേതാവ് പാണക്കാട് സയ്യിദ് സാദിഖ്അലി ശിഹാബ്തങ്ങള്‍ കഴിഞ്ഞദിവസം പരവൂര്‍, തെക്കുംഭാഗം, ഇടപ്പള്ളിക്കോട്ട എന്നിവിടങ്ങളിലായി രണ്ട് പൊതുയോഗങ്ങളില്‍ പങ്കെടുത്തിരുന്നു.