കൊച്ചി: മാതാവിന്റെ മര്‍ദനത്തില്‍ പരുക്കേറ്റ് മരിച്ച മൂന്നുവയസുകാരന്റെ മൃതദേഹം ഖബറടക്കി. കളമശ്ശേരി എച്ച്.എം കോളനി പാലക്കാ മുഗള്‍ വടക്കോട് മുഹിയുദ്ധില്‍ ജുമാമസ്ജിദ് ഖബര്‍സ്ഥാനില്‍ ഇന്നലെ ഉച്ചയ്ക്ക് നടന്ന ചടങ്ങില്‍ നൂറുകണക്കിന് ആളുകള്‍ പങ്കെടുത്തു. കളമശ്ശേരി മെഡിക്കല്‍ കോളജ് മോര്‍ച്ചറിയില്‍ വെള്ളിയാഴ്ച വൈകിട്ടോടെ പോസ്റ്റ്‌മോര്‍ട്ടം പൂര്‍ത്തിയായ കുട്ടിയുടെ മൃതദേഹം ഖബറടക്കുന്നത് പൊലിസിന്റെ നിര്‍ദേശത്തെ തുടര്‍ന്ന് അടുത്ത ദിവസത്തേക്ക് മാറ്റിവയ്ക്കുകയായിരുന്നു.
ഇന്നലെ സിറ്റി പൊലിസ് കമ്മിഷണറുടെ നിര്‍ദേശ പ്രകാരം ഉച്ചയ്ക്ക് 11.30ഓടെ മെഡിക്കല്‍ കോളജില്‍ സൂക്ഷിച്ച മൃതദേഹം കാക്കനാട് ജയിലിലുള്ള മാതാവ് ഹെനയെയും ഏലൂര്‍ പൊലിസിന്റെ കസ്റ്റഡിയിലായിരുന്ന പിതാവ് ഷാജത്ഖാനെയും കാണിച്ചു.
ക്രൂരമായ മര്‍ദനത്തില്‍ മരണപ്പെട്ട മകന്റെ ചേതനയറ്റ ശരീരം കണ്ടതോടെ മാതാവ് അലമുറയിട്ട് കരഞ്ഞു. തുടര്‍ന്ന് ഉച്ചയ്ക്ക് 12 ഓടെ പാലക്കാ മുഗള്‍ ജുമുഅ മസ്ജിദ് ഖബര്‍സ്ഥാനില്‍ വന്‍ ജനാവലിയുടെ സാന്നിധ്യത്തില്‍ കുട്ടിയെ ഖബറടക്കി. പള്ളി ഇമാം മൊയ്ദു നദ്‌വി ജനാസ നിസ്‌കാരത്തിന് നേതൃത്വം നല്‍കി.
ഖബറടക്കത്തിന് ശേഷമാണ് പിതാവിനെ പൊലിസ് കൊണ്ടുപോയത്. ജില്ലാ കലക്ടര്‍ മുഹമ്മദ് വൈ സഫീറുല്ല, വി.കെ ഇബ്രാഹിം കുഞ്ഞ് എം.എല്‍.എ, മുന്‍ നഗരസഭാ ചെയര്‍മാന്‍ ജമാല്‍ മണക്കാടന്‍ ഉള്‍പ്പെടെ നിരവധി പേര്‍ പങ്കെടുത്തു.