തൊടുപുഴ:  പരീക്ഷാഫീസിനത്തില്‍ വന്‍തുക വിദ്യാര്‍ഥികളില്‍ നിന്ന് ഈടാക്കിയ ശേഷം കോളജുകളുടെ മേല്‍ മുഴുവന്‍ പരീക്ഷാജോലിഭാരവും കെട്ടിവെച്ച് കൈയൊഴിയുന്ന നടപടികളില്‍ നിന്ന് സര്‍വകലാശാലകള്‍ പിന്തിരിയണമെന്ന് കേരള പ്രൈവറ്റ് എയ്ഡഡ് കോളജ് മാനേജ്‌മെന്റ്‌സ് അസോസിയേഷന്‍ പൊതുയോഗം ആവശ്യപ്പെട്ടു.
സര്‍വകലാശാലകളുടെ ഇത്തരം നിലപാടുകള്‍ പരീക്ഷാ നടത്തിപ്പിനെ പ്രതികൂലമായി ബാധിക്കും. മുന്നൊരുക്കങ്ങള്‍ക്ക് ആവശ്യമായ സമയം നല്‍കാതെയും സാങ്കേതിക ഉപകരണങ്ങള്‍ ക്രമികരിക്കാതെയും ടെക്‌നിക്കല്‍ സ്റ്റാഫ് ഉള്‍പ്പെടെയുള്ള അനധ്യാപക തസ്തികകള്‍ നികത്താതെയും  തിടുക്കപ്പെട്ട് ചോദ്യപേപ്പര്‍ അച്ചടി അടക്കമുള്ള ചുമതലകള്‍ കോളജുകളെ കെട്ടി ഏല്‍പിക്കുന്നത് പരീക്ഷകളുടെ സുഗമമായ നടത്തിപ്പിനെ ബാധിക്കും. ഇത് ചോദ്യപേപ്പറിന്റെ രഹസ്യസ്വഭാവം ഇല്ലാതാക്കും.
സര്‍വകലാശാലയിലെ സാങ്കേതികവിദ്യയുടെ പിഴവുകള്‍പോലും കോളജുകളുടെ മേല്‍ ആരോപിച്ച് ലക്ഷങ്ങളുടെ തുക ഫൈന്‍ ഇനത്തില്‍ സര്‍വകലാശാലകള്‍ ഈടാക്കുന്നത് അംഗീകരിക്കാനാവില്ല.
നൂതനങ്ങളായ പരീക്ഷാപരിഷ്‌കാരങ്ങള്‍ക്ക് ആവശ്യമായ സാങ്കേതികസൗകര്യങ്ങള്‍ കോളജുകളില്‍  ഏര്‍പ്പെടുത്താന്‍ സര്‍വകലാശാലാ-സര്‍ക്കാര്‍തലങ്ങളില്‍ നടപടി  ഉണ്ടായാല്‍ മാത്രമെ കുറ്റമറ്റവിധം പരീക്ഷാജോലികള്‍ നടത്താന്‍ കഴിയുകയുള്ളുവെന്നും യോഗം വിലയിരുത്തി.
കോളജുകളില്‍  രാഷ്ട്രീയാതിക്രമങ്ങളും കലാപവും നടത്താനുള്ള ശ്രമങ്ങള്‍ നിയമാധിഷ്ഠിതമായി നേരിടും. എയ്ഡഡ് കോളജുകളിലെ മുഴുവന്‍ അധ്യാപക-അനധ്യാപക ഒഴിവുകള്‍ എത്രയും വേഗം നികത്തണമെന്നും യോഗം സര്‍ക്കാരിനോട് ആവശ്യപ്പെട്ടു.
അസോസിയേഷന്‍ പ്രസിഡന്റ് പ്രൊഫ. ആര്‍ പ്രസന്നകുമാര്‍ അധ്യക്ഷനായി.
ജനറല്‍ സെക്രട്ടറി ഡോ. വിന്‍സെന്റ് നെടുങ്ങാട്ട്, പ്രിന്‍സിപ്പല്‍സ് കൗണ്‍സില്‍ പ്രസിഡന്റ് ഡോ.എം ഉസ്മാന്‍, കെസിബിസി എഡ്യൂക്കേഷന്‍ സെക്രട്ടറി ഫാ. ജേക്കബ് പാലയ്ക്കാപ്പിള്ളി, എം.ഇ.എസ് പ്രതിനിധി പി. മുഹമ്മദ്, എം.ഒ.സി കോളജുകളുടെ മാനേജര്‍ പ്രൊഫ.ജേക്കബ് കെ മാത്യു തുടങ്ങിയവര്‍ സംസാരിച്ചു.