കാസര്‍കോട്: അപകടത്തില്‍ പെട്ടവരെ തിരിഞ്ഞുനോക്കാത്ത ഞെട്ടിക്കുന്ന ദൃശ്യങ്ങളടക്കം പലപ്പോഴായി പുറത്തുവന്നിട്ടുണ്ട്. അപകടത്തില്‍ പെട്ട ഗര്‍ഭിണിയായ കന്നുകാലിയെ സ്വന്തമെന്ന പോലെ ശുശ്രൂഷിച്ച നന്മയുടെ ചിത്രമാണ് കഴിഞ്ഞ ദിവസം വിദ്യാനഗര്‍ ബി.സി റോഡിലുണ്ടായത്. കാറിടിച്ച് പരുക്കേറ്റ കന്നുകാലിയെ ശുശ്രൂഷിച്ചാണ് നാട്ടുകാരും ആരോഗ്യപ്രവര്‍ത്തകരും മാതൃകയായത്.
അഞ്ചുമാസം ഗര്‍ഭിണിയായ കന്നുകാലിക്കാണ് അപകടമുണ്ടായത്. ഇന്നലെ വൈകിട്ട് ബി.സി റോഡ് സിവില്‍സ്റ്റേഷന്‍ പരിസരത്ത് വച്ച് മാരുതി ആള്‍ട്ടോ കാര്‍ ഇടിക്കുകയായിരുന്നു. റോഡില്‍ കിടന്ന കന്നുകാലിയെ നാട്ടുകാര്‍ ചേര്‍ന്ന് റോഡിന്റെ അരികിലെത്തിച്ചു. നാട്ടുകാര്‍ വിവരമറിയിച്ചതിനെ തുടര്‍ന്ന് കാസര്‍കോട് ജില്ലാ വെറ്റിനറി കേന്ദ്രത്തില്‍ നിന്ന് ആരോഗ്യ പ്രവര്‍ത്തകര്‍ എത്തി. സീനിയര്‍ വെറ്റിനറി സര്‍ജന്‍ ഡോ. ബാലചന്ദ്ര റാവുവിന്റെ നേതൃത്വത്തില്‍ കന്നുകാലിക്ക് ചികിത്സ ലഭ്യമാക്കി. പരുക്കേറ്റ ഇടതുകാലിന് പ്ലാസ്റ്റര്‍ ഓഫ് പാരിസ് ഇട്ട് മരുന്നും നല്‍കി. പശുവിന്റെ ഉടമസ്ഥനാരെന്ന് അറിഞ്ഞിട്ടില്ല. തുടര്‍ന്ന് പശുവിനെ ഒരു മരത്തണലില്‍ ആക്കിയ ശേഷമാണ് നാട്ടുകാരും ആരോഗ്യപ്രവര്‍ത്തകരും മടങ്ങിയത്.