തൃശൂര്‍: പൂരത്തോടനുബന്ധിച്ച് തിരുവമ്പാടിയുടെ നേതൃത്വത്തില്‍ നടുവിലാലില്‍ നിര്‍മിച്ച പന്തല്‍ ഗിന്നസ് ബുക്കിലേക്ക്. 110 അടി ഉയരത്തില്‍ തഞ്ചാവൂര്‍ ക്ഷേത്ര മാതൃകയില്‍ നിര്‍മിച്ച പന്തല്‍ ഉയരത്തിന്റെ അടിസ്ഥാനത്തിലാണ് ഗിന്നസ് ബുക്ക് ഓഫ് റെക്കോഡ്‌സിലേക്ക് നീങ്ങുന്നത്. നേരത്തെ കര്‍ണാടകത്തില്‍ നിര്‍മിച്ച 70 അടി ഉയരത്തിലുള്ള പന്തല്‍ ഗിന്നസ് ബുക്കില്‍ ഇടംനേടുമെന്ന് പ്രതീക്ഷിച്ചിരുന്നെങ്കിലും മാനദണ്ഡങ്ങള്‍ പൂര്‍ണമായും പാലിക്കാത്തതിനാല്‍ റെക്കോര്‍ഡ് ലഭിച്ചിരുന്നില്ല.
എന്നാല്‍ പൂര പന്തല്‍ റെക്കോര്‍ഡില്‍ ഇടംനേടുമെന്ന് സംഘാടകര്‍ വാര്‍ത്താസമ്മേളനത്തില്‍ പറഞ്ഞു. ഗിന്നസ് റെക്കോര്‍ഡില്‍ ഇടംനേടുന്നതിനായി പന്തലിന്റെ നിര്‍മാണംമുതല്‍ ഗിന്നസ്ബുക്ക് റെക്കോര്‍ഡ്‌സിന്റെ ഏഷ്യാ ജൂറിമാരായ ഗിത്താറിസ്റ്റ് ഗിന്നസ് സെബാസ്റ്റ്യന്‍, സുനില്‍ ജോസഫ് എന്നിവരുടെ നേതൃത്വത്തില്‍ പന്തലിന്റെ വിവിധ നിര്‍മാണ പ്രവര്‍ത്തനങ്ങള്‍ പരിശോധിച്ചുവരികയാണ്.
ഇന്ന് രാവിലെ 10ന് ഈ പരിശോധന പൂര്‍ത്തിയാക്കുകയും മന്ത്രി വി.എസ് സുനില്‍കുമാറിന്റെ സാന്നിധ്യത്തില്‍ ഗിന്നസ് സര്‍ട്ടിഫിക്കറ്റ് തിരുവമ്പാടി ഭാരവാഹികള്‍ക്ക് കൈമാറുകയും ചെയ്യും. വിയ്യൂര്‍ ശിവ ലക്ഷ്വറി ഇവന്റ്‌സ് ഉടമ ശിവമധുവിന്റെ നേതൃത്വത്തില്‍ 150 ഓളം തൊഴിലാളികളുടെ ഒന്നരമാസത്തെ ശ്രമഫലമായാണ് പന്തല്‍ നിര്‍മാണം പൂര്‍ത്തീകരിച്ചത്. നടുവിലാല്‍ ഗണപതിത്തറയിലെ ആല്‍മരത്തിന്റെ ഒരു ശിഖരം പോലും മുറിക്കാതെ നിര്‍മാണം നിര്‍വഹിച്ചതുമൂലം പന്തലിന് പ്രകൃതി രമണീയതയും കൈവരിക്കാന്‍ സാധിച്ചു. തികച്ചും ഫൈബര്‍ നിര്‍മിതമായ ഈ പന്തല്‍ മഴയോ മറ്റ് പ്രകൃതിക്ഷോഭമോ ഉണ്ടാകുകയാണെങ്കില്‍ പോലും ജനങ്ങളുടെ സുരക്ഷിതത്വത്തിന് ഒരു കോട്ടവുമുണ്ടാകില്ല.
ഡോ. ടി.എ സുന്ദര്‍ മേനോന്റെ നേതൃത്വത്തിലാണ് ഈ പന്തല്‍ നിര്‍മാണം നടന്നത്. ഇന്നലെ വൈകുന്നേരത്തോടെ പന്തലിലെ ബള്‍ബുകള്‍ തെളിഞ്ഞതോടെ പന്തല്‍ പൂരനഗരിക്ക് മറക്കാനാകാത്ത അനുഭവമായി. തിരുവമ്പാടി ദേവസ്വം പ്രസിഡന്റ് പ്രൊഫ. പി. ചന്ദ്രശേഖരന്‍, ഡോ.ടി.എ സുന്ദര്‍ മേനോന്‍, ഗിന്നസ് സെബാസ്റ്റ്യന്‍, ശില്‍പി ശിവ മധു പങ്കെടുത്തു.