സുല്‍ത്താന്‍ബത്തേരി:  നഞ്ചന്‍ഗോഡ്-സുല്‍ത്താന്‍ ബത്തേരി-നിലമ്പൂര്‍ റയില്‍പാതയുടെ വിശദമായ പദ്ധതിരേഖ തയാറാക്കാന്‍ ഡി.എം.ആര്‍.സിക്ക് അനുവദിച്ച എട്ടുകോടി രൂപയില്‍നിന്ന് രണ്ടുകോടി രൂപ ഡി.എം.ആര്‍.സിയുടെ ബാങ്ക് അക്കൗണ്ടില്‍ നിക്ഷേപിക്കാന്‍ 2017 ഫെബ്രുവരി 13ന് സര്‍ക്കാര്‍ ഉത്തരവ് പുറപ്പെടുവിച്ചിട്ടും പണം നിക്ഷേപിക്കാത്ത സംഭവത്തില്‍ അടിയന്തര ഇടപെടല്‍ നടത്തണമെന്ന് ആവശ്യപ്പെട്ട് ഐ.സി ബാലകൃഷ്ണന്‍ എം.എല്‍.എ മുഖ്യമന്ത്രി പിണറായി വിജയനെ സന്ദര്‍ശിച്ച് കത്തു നല്‍കി.
 നഞ്ചന്‍ഗോഡ്-നിലമ്പൂര്‍ റയില്‍പാത പദ്ധതി അട്ടിമറിക്കാന്‍ ശ്രമം നടക്കുന്നത് സംബന്ധിച്ച് വരുന്ന പത്രവാര്‍ത്തകള്‍ അദ്ദേഹം മുഖ്യമന്ത്രിയുടെ ശ്രദ്ധയില്‍പ്പെടുത്തി. നഞ്ചന്‍ഗോഡ്-നിലമ്പൂര്‍ റയില്‍ പാതയുടെ തുടര്‍നടപടികള്‍ സംബന്ധിച്ച് ഡോ. ഇ ശ്രീധരനെ പങ്കെടുപ്പിച്ച് ജനപ്രതിനിധികളുടെയും രാഷ്ട്രീയ നേതാക്കളുടെയും ആഷന്‍ കമ്മിറ്റി ഭാരവാഹികളുടെയും അടിയന്തിരയോഗം വിളിച്ചുചേര്‍ക്കണമെന്നും ഐ.സി ബാലകൃഷ്ണന്‍ എം.എല്‍.എ മുഖ്യമന്ത്രിയോട് ആവശ്യപ്പെട്ടു. നഞ്ചന്‍ഗോഡ്-നിലമ്പൂര്‍ റയില്‍പാതയുടെ സര്‍വേക്ക് അനുവദിച്ച തുക ഡി.എം.ആര്‍.സിക്ക് നല്‍കാതെ ഡി.എം.ആര്‍.സിയെ ബുദ്ധിമുട്ടിക്കുന്നത് സംബന്ധിച്ച്  പ്രതിപക്ഷനേതാവ് രമേശ് ചെന്നിത്തല, മുന്‍ മുഖ്യമന്ത്രി ഉമ്മന്‍ ചാണ്ടി എന്നിവരുമായും അദ്ദേഹം ചര്‍ച്ച നടത്തി. വിഷയം സംബന്ധിച്ച് പ്രതിപക്ഷനേതാവും മുഖ്യമന്ത്രിക്ക് കത്ത് നല്‍കിയിട്ടുണ്ട്.