കാബൂള്‍: അഫ്ഗാനിസ്താനിലെ ഐ.എസ് തലവന്‍ കൊല്ലപ്പെട്ടതായി റിപ്പോര്‍ട്ട്. നംഗര്‍ഹാര്‍ പ്രവിശ്യയിലെ ഐ.എസ് രഹസ്യകേന്ദ്രങ്ങളില്‍ നടത്തിയ സൈനിക ഓപറേഷനിലാണ് ഐ.എസിന്റെ അഫ്ഗാന്‍ ഘടകത്തെ നയിക്കുന്ന അബൂ സഅദ് ഇര്‍ഹാബി കൊല്ലപ്പെട്ടത്. സര്‍ക്കാര്‍ സൈന്യമാണ് അവകാശവാദവുമായി രംഗത്തെത്തിയത്.
ശനിയാഴ്ച രാത്രിയായിരുന്നു സൈനിക നടപടി. അഫ്ഗാന്‍ സൈന്യത്തോടൊപ്പം വിദേശ സൈന്യങ്ങളും പങ്കുചേര്‍ന്ന കര-വ്യോമനീക്കത്തില്‍ പത്തു ഭീകരര്‍ കൂടി കൊല്ലപ്പെട്ടതായി കാബൂളിലെ ദേശീയ സുരക്ഷാ ഡയരക്ടറേറ്റ് പ്രസ്താവനയില്‍ അറിയിച്ചു. താവളങ്ങളില്‍നിന്നു വലുതും ചെറുതുമായ ആയുധങ്ങളും വെടിക്കോപ്പുകളും കണ്ടെടുത്തിട്ടുണ്ട്. സംഭവത്തില്‍ ഇതുവരെ ഐ.എസിന്റെ ഔദ്യോഗിക വാര്‍ത്താ ഏജന്‍സിയായ ആമാഖില്‍ പ്രതികരണമൊന്നും വന്നിട്ടില്ല.