ബാര്‍ബഡോസ്: ടി20 ക്രിക്കറ്റില്‍ ചരിത്ര നേട്ടവുമായി പാക്കിസ്താന്‍ താരം. മുഹമ്മദ് ഇര്‍ഫാന്‍ എന്ന പാക്കിസ്താന്‍ ബൗളറാണ് മികച്ച ബൗളിങ്ങ് പ്രകടനത്തിലൂടെ ചരിത്രത്തില്‍ ഇടം നേടിയത്.
കരീബിയന്‍ പ്രീമിയര്‍ ലീഗിലായിരുന്ന താരത്തിന്റെ നേട്ടം. ഇന്നലെ ബാര്‍ബഡോസ് ട്രൈഡന്റ്‌സും സെന്റ് കിറ്റ്‌സ് ആന്റ് നെവിസ് പാട്രിയാട്‌സും തമ്മില്‍ നടന്ന മത്സരത്തിലായിരുന്നു ചരിത്രം പിറന്നത്. നാല് ഓവര്‍ എറിഞ്ഞ ഇര്‍ഫാന്‍ 23 പന്തുകളില്‍ റണ്ണൊന്നും വഴങ്ങാതെ വിട്ടുകൊടുത്തത് ഒരു റണ്‍ മാത്രം. മൂന്ന് ഓവറുകള്‍ മെയ്ഡന്‍ ആവുകയും ചെയ്തു. രണ്ടു വിക്കറ്റും താരം വീഴ്ത്തി. ഇര്‍ഫാന്‍ മികച്ച പ്രകടനം പുറത്തെടുത്തെങ്കിലും ബാര്‍ബഡോസ് ട്രൈഡന്റ്‌സിന് തോല്‍വി തടയാനായില്ല.
ആറു വിക്കറ്റിനായിരുന്നു ബാര്‍ബഡോസിന്റെ തോല്‍വി. ആദ്യം ബാറ്റ് ചെയ്ത ട്രിഡെന്റ്‌സ് നിശ്ചിത 20 ഓവറില്‍ 147 റണ്‍സെടുത്തു. 45 റണ്‍സെടുത്ത ക്യാപ്റ്റന്‍ ജേസണ്‍ ഹോള്‍ഡറായിരുന്നു ട്രിഡെന്റ്‌സിന്റെ ടോപ്പ് സ്‌കോറര്‍.
മറുപടി ബാറ്റിങ്ങിനിറങ്ങിയ പാട്രിയട്‌സ് 18.5 ഓവറില്‍ ലക്ഷ്യം കാണുകയായിരുന്നു. മികച്ച പ്രകടനം നടത്തിയ ഇര്‍ഫാന്‍ തന്നെയാണ് കളിയിലെ താരമായത്.