ചാര്‍ട്ടേഡ് അക്കൗണ്ടന്‍സി കോഴ്‌സിന്റെ സിലബസ് പരിഷ്‌കരിക്കുന്നു. പുതിയ പാഠ്യപദ്ധതി നവംബറില്‍ പ്രധാനമന്ത്രി നരേന്ദ്രമോദി ഉദ്ഘാടനം ചെയ്യും. ഇന്‍സ്റ്റിറ്റ്യൂട്ട് ഓഫ് ചാര്‍ട്ടേഡ് അക്കൗണ്ടന്റ്‌സ് ഒഫ് ഇന്ത്യ പ്രസിഡന്റ് എം. ദേവരാജ റെഡ്ഡി അറിയിച്ചതാണ് ഇക്കാര്യം.

പഴയ സിലബസില്‍ പഠനം തുടരണമെന്നാഗ്രഹിക്കുന്നവര്‍ക്ക് അതിനു സൗകര്യമുണ്ടാകും. ആറു വര്‍ഷത്തേക്കു പഴയ സിലബസ് നിലനിര്‍ത്തുമെന്ന് അദ്ദേഹം പറഞ്ഞു. ഐ.സി.എ.ഐയുടെ വിദ്യാഭ്യാസ, പരിശീലന റിവ്യൂ കമ്മിറ്റിയാണ് പാഠ്യപദ്ധതി പരിഷ്‌കരണത്തിനു മേല്‍നോട്ടം വഹിക്കുന്നത്.

ജി.എസ്.ടി നിയമത്തിനുള്ള പശ്ചാത്തല സംവിധാനങ്ങള്‍ സജ്ജമാക്കുന്നതിനും അടുത്തിടെ പ്രഖ്യാപിച്ച വരുമാനം വെളിപ്പെടുത്തല്‍ പദ്ധതി 2016 ന്റെ വിജയത്തിനായും ഐ.സി.എ.ഐ കേന്ദ്ര സര്‍ക്കാരുമായി സഹകരിച്ചു പ്രവര്‍ത്തിക്കുന്നു. റെയില്‍വേയുടെ അക്കൗണ്ടിങ് സംവിധാനം ഡബിള്‍ എന്‍ട്രി ആക്കുന്നതിനു സി.എ ഇന്‍സ്റ്റിറ്റ്യൂട്ടിന്റെ അക്കൗണ്ടിങ് റിസര്‍ച്ച് ഫൗണ്ടേഷന്റെ സേവനം ലഭ്യമാക്കിയതായി അദ്ദേഹം പറഞ്ഞു.