തിരുവനന്തപുരം: തൊടുപുഴയില്‍ അമ്മയുടെ കാമുകന്റെ ക്രൂരമര്‍ദനമേറ്റ് ഏഴ് വയസുകാരന്‍ മരിച്ച സംഭവത്തില്‍ പ്രതികളെ രക്ഷപ്പെടുത്താന്‍ ശ്രമം നടക്കുന്നുവെന്ന് ആരോപിച്ച് സംസ്ഥാന സര്‍ക്കാര്‍ നിയന്ത്രണത്തിലുള്ള മൂന്ന് സ്ഥാപനങ്ങളുടെ ഔദ്യോഗിക വെബ്‌സൈറ്റുകള്‍ ഹാക്ക് ചെയ്തു. പാകിസ്താന്‍ അടക്കമുള്ള രാജ്യങ്ങളില്‍ ഹാക്കിങ് നടത്തി പ്രശസ്തരായ കേരള സൈബര്‍ വാരിയേഴ്‌സ് എന്ന കൂട്ടായ്മയാണ് ഇതിന് പിന്നില്‍. സംസ്ഥാന മനുഷ്യാവകാശ കമ്മിഷന്‍, ബാലാവകാശ കമ്മിഷന്‍, സംസ്ഥാന നിയമ വകുപ്പ് എന്നിവയുടെ വെബ്‌സൈറ്റുകളാണ് ഇവര്‍ ഹാക്ക് ചെയ്തത്.
തൊടുപുഴയില്‍ ഏഴ് വയസുകാരന്‍ കൊല്ലപ്പെട്ട സംഭവത്തില്‍ കുട്ടിയുടെ അമ്മയ്‌ക്കെതിരേ ഇതുവരെ കേസെടുത്തിട്ടില്ലെന്നും ഇതിന് പിന്നില്‍ വന്‍ രാഷ്ട്രീയ ഇടപെടലുണ്ടെന്ന് സംശയിക്കുന്നതായും സൈബര്‍ വാരിയേഴ്‌സ് ആരോപിക്കുന്നു. ഉയര്‍ന്ന മാര്‍ക്ക് നേടി ഉന്നത വിദ്യാഭ്യാസം കരസ്ഥമാക്കിയ യുവതി, തന്റെ കുഞ്ഞിന് ഇത്രയും ക്രൂരമായി മര്‍ദനമേറ്റിട്ടും ഒരിക്കലെങ്കിലും അരുതേ എന്ന് പറയാന്‍ തയാറായിട്ടില്ല. കുഞ്ഞുമായി ആശുപത്രിയില്‍ എത്തിയതിന് ശേഷമുള്ള ദൃശ്യങ്ങളില്‍ ഇക്കാര്യം വ്യക്തമാണ്. ഇല്ലാത്ത മാനസിക വിഭ്രാന്തിയുടെ പേരില്‍ അവര്‍ക്കെതിരേ കേസെടുക്കാതിരിക്കുന്നത് നീതികരിക്കാനാവില്ലെന്നും സൈബര്‍ വാരിയേഴ്‌സ് പറയുന്നു.