തൊടുപുഴ: താലൂക്കിലെ ഏറ്റവും വലിയ പാടശേഖരമായ അഞ്ചിരി പാടശേഖരം കനത്ത മഴയില്‍ വെള്ളത്തില്‍ മുങ്ങിയതോടെ കര്‍ഷകര്‍ക്ക് ലക്ഷങ്ങളുടെ നഷ്ടം. 80 ഏക്കര്‍ വരുന്ന പാടശേഖരത്തിലെ 40 ഏക്കറോളമാണ് കഴിഞ്ഞ ദിവസങ്ങളില്‍ പെയ്ത കനത്ത മഴയില്‍ വെള്ളത്തിലായത്.
വിതയ്ക്കാന്‍ ഒരുക്കിയിട്ടിരുന്ന നിലവും വിത്തും നശിച്ചതോടെ വായ്പയെടുത്തും പാട്ടത്തിനെടുത്തും കൃഷി ചെയ്ത കര്‍ഷകരുടെ സ്വപ്നങ്ങളില്‍ കരിനിഴല്‍ വീണു. ഇനി എന്തു ചെയ്യുമെന്നറിയാതെ തോരാ ക്കണ്ണീരുമായി കഴിയുകയാണ് കര്‍ഷകര്‍.
പാടശേഖരത്തിന്റെ പകുതിയോളം ഭാഗം ഉയര്‍ന്ന പ്രദേശമായതിനാല്‍ മഴ ഈ ഭാഗത്തെ കൃഷിയെ ബാധിച്ചില്ല. ബാക്കി 40 ഏക്കറില്‍ 25 ഏക്കറിലെ കൃഷി പൂര്‍ണമായും നശിച്ചു.
15 ഏക്കറില്‍ വിതയ്ക്കാനുള്ള എല്ലാ ഒരുക്കങ്ങളും പൂര്‍ത്തിയായിരുന്നു. നിലമൊരുക്കല്‍ വരെയുള്ള ജോലികള്‍ തീര്‍ത്ത് വിത്തും ഒരുക്കിയിരുന്നു. ഇവയെല്ലാം മഴയില്‍ നശിച്ചു. മഴയ്ക്ക് ശമനമുണെ്ടങ്കിലും വെള്ളം പൂര്‍ണമായും ഇറങ്ങാത്തതിനാല്‍ പാടശേഖരത്തില്‍ ഇപ്പോള്‍ ഒരു ജോലിയും ചെയ്യാന്‍ കഴിയാത്ത അവസ്ഥയാണ്. കൃഷി വകുപ്പ് ഉദ്യോഗസ്ഥര്‍ സ്ഥലം സന്ദര്‍ശിച്ച് നാശനഷ്ടം വിലയിരുത്തി.
ആറു ലക്ഷത്തോളം രൂപയുടെ നഷ്ടമുണ്ടായതായാണ് പ്രാഥമിക കണക്ക്.
സ്വന്തമായും പാട്ടത്തിനെടുത്തും കുടുംബശ്രീയുടെയും നേതൃത്വത്തിലാണ് ഇവിടെ നെല്‍കൃഷി ചെയ്യുന്നത്. എല്ലാവര്‍ഷവും രണ്ടു കൃഷി നടത്തിക്കൊണ്ടിരുന്ന പാടശേഖരത്തില്‍ ആദ്യമായാണ് ഇത്രയും കൃഷിനാശം സംഭവിക്കുന്നത്.
പാറയില്‍ മാര്‍ട്ടിന്‍, വേങ്ങയില്‍ വിന്‍സന്റ്, ചെറുതോട്ടില്‍ പി.പി ജോസഫ്, ചെറുപുറത്ത് സണ്ണി തോമസ്, ടോമി തോമസ് കാവാലം, എ.ആര്‍. ശശി ഞാറക്കാട്ടില്‍, എ.ആര്‍. മാധവന്‍ ഞാറക്കാട്ടില്‍, സിജു വട്ടക്കുന്നേല്‍ എന്നിവര്‍ക്കാണ് കാര്യമായ നാശനഷ്ടം സംഭവിച്ചത്.
കൃഷി നാശം സംഭവിച്ചവര്‍ക്ക് അടിയന്തര ധനസഹായം നല്‍കണമെന്ന് ആലക്കോട് പഞ്ചായത്ത് അംഗം ടോമി കാവാലം ആവശ്യപ്പെട്ടു. സര്‍ക്കാര്‍ അടിയന്തര ധനസഹായം അനുവദിച്ചില്ലെങ്കില്‍ തുടര്‍കൃഷി നടത്താന്‍ കഴിയില്ലെന്നാണ് കര്‍ഷകര്‍ പറയുന്നത്.