കൊച്ചി: പ്രളയദുരന്തത്തില്‍ മരിച്ചവരുടെ കുടുംബങ്ങള്‍ക്ക് 20 ലക്ഷം രൂപ ധനസഹായം നല്‍കണമെന്ന് കേരള പ്രതികരണ സമിതി വാര്‍ത്താസമ്മേളനത്തില്‍ ആവശ്യപ്പെട്ടു. വീട് നഷ്ടപെട്ടവര്‍ക്ക് വീടും മറ്റ് നാശനഷ്ടങ്ങളുടെ മൂല്യം കണക്കാക്കി നഷ്ടപരിഹാരവും നല്‍കുവാന്‍ സര്‍ക്കാര്‍ തയാറാകണം. പ്രളയകാലത്ത് രക്ഷാപ്രവര്‍ത്തനങ്ങള്‍ക്ക് നേതൃത്വം നല്‍കിയ മല്‍സ്യതൊഴിലാളികളെ അഭിനന്ദിക്കുന്നതായും സമിതി ചെയര്‍മാന്‍ എന്‍.ജി ശിവദാസ് അറിയിച്ചു. സര്‍ക്കാരും പൊലിസും ഫയര്‍ഫോഴ്‌സും മറ്റ് സേനാ വിഭാഗങ്ങളും ഒരുമിച്ച് നിന്ന് പ്രവര്‍ത്തിച്ചതാണ് ദുരിതത്തെ മറികടക്കുവാന്‍ സഹായിച്ചത്.
ദുരിതബാധിതര്‍ക്ക് നല്‍കുന്ന സഹായങ്ങള്‍ അര്‍ഹതപെട്ടവര്‍ക്ക് നല്‍കുവാന്‍ സര്‍ക്കാര്‍ നടപടികള്‍ സ്വീകരിക്കണമെന്നും പ്രതികരണവേദി ആവശ്യപ്പെട്ടു. ദുരന്തബാധിതര്‍ക്കായി ഫണ്ട് പിരിവ് നടത്തി അത് റവന്യു പൊലിസ് ഉദ്യോഗസ്ഥരുടെ സാനിധ്യത്തില്‍ അര്‍ഹതപ്പെട്ടവര്‍ക്ക് കൈമാറുവാനും സംഘടനയ്ക്ക് പദ്ധതിയുണ്ട്. സമിതി ഭാരവാഹികളായ ജിബി ഭട്ട്, പ്രശാന്തി ചൊവ്വര, കെ.എ ലാസര്‍ വാര്‍ത്ത സമ്മേളനത്തില്‍ പങ്കെടുത്തു.