വളാഞ്ചേരി: 16 കാരിയെ പീഡിപ്പിച്ചെന്ന പരാതിയില്‍ വളാഞ്ചേരി നഗരസഭാ കൗണ്‍സിലര്‍ക്കെതിരേ കേസെടുത്തു. ഇടതുപക്ഷ കൗണ്‍സിലര്‍ ഷംസുദ്ദീന്‍ നടക്കാവിനെതിരേയാണ് പൊലിസ് കേസെടുത്തത്. 16 കാരിയായ വിദ്യാര്‍ഥി തന്നെ പീഡിപ്പിച്ചെന്ന് ആരോപിച്ച് ചൈല്‍ഡ് ലൈന്‍ അധികൃതര്‍ക്ക് നല്‍കിയ പരാതിയെ തുടര്‍ന്നാണ് കേസ്. ചൈല്‍ഡ് ലൈന്‍ അധികൃതര്‍ ജില്ലാ കലക്ടര്‍ക്കും മലപ്പുറം ഡി.വൈ.എസ്പിക്കും പരാതി കൈമാറുകയായിരുന്നു.
ഇതേതുടര്‍ന്ന് ഇയാള്‍ക്കെതിരേ പോക്‌സോ ചുമത്തി കേസെടുത്തു. വിദേശത്ത് ബിസിനസ് ചെയ്തുവരുന്ന ഷംസുദ്ദീന്‍ നഗരസഭയിലെ 32ാം ഡിവിഷനില്‍ നിന്നാണ് ഇടതുപക്ഷ സ്വതന്ത്രനായി വിജയിച്ചത്.
ഷംസുദ്ദീന്റ ഉടമസ്ഥയിലുള്ള ക്വാട്ടേഴ്‌സിലാണ് പീഡനത്തിന് ഇരയായ വിദ്യാര്‍ഥിനിയും സഹോദരിയും താമസിച്ചിരുന്നത്. പരാതി നല്‍കാതിരിക്കാന്‍ ഭീഷണിപ്പെടുത്തിയതായും ആരോപണമുണ്ട്. അതേസമയം തന്റെ സ്വത്ത് തട്ടിയെടുക്കാനുള്ള തന്ത്രമാണ് ആരോപണത്തിന് പിന്നിലെന്ന് ഷംസുദ്ദീന്‍ പറഞ്ഞു.