ഒറ്റപ്പാലം: ഒറ്റപ്പാലം താലൂക്കില്‍12 വില്ലേജുകള്‍ പ്രളയ ബാധിതമായി പ്രഖ്യാപിച്ചു. വെള്ളപ്പൊക്കത്തെ തുടര്‍ന്ന് ഭക്ഷ്യവകുപ്പിനു 6668 കിലോ ഗോതമ്പും 1000 കിലോ അരിയും നശിച്ചതായി ഒറ്റപ്പാലം താലൂക്ക് വികസനസമിതി യോഗത്തില്‍ സപ്ലൈ ഓഫിസ് അധികൃതര്‍ പറഞ്ഞു. ഗോഡൗണുകളിലും റേഷന്‍ കടകളിലുമായി വെള്ളം കയറിയതിനെ തുടര്‍ന്നാണ് 6668 കിലോ ഗോതമ്പും 1000 കിലോ അരിയും നശിച്ചത്.
ഒറ്റപ്പാലം തെന്നടിബസാറില്‍ 22 ചാക്കുകളിലായി സൂക്ഷിച്ച 1051 കിലോ അരി, 5 ചാക്ക് ഗോതമ്പ്, 75 കിലോ പഞ്ചസാര എന്നിവയാണ് നശിച്ചത്. ശ്രീകൃഷ്ണപുരം ഗോഡൗണില്‍ 131 ചാക്കുകളിലായി സൂക്ഷിച്ച 6668 കിലോ ഗോതമ്പാണ് വെള്ളം കയറി നശിച്ചത്. ഷൊര്‍ണ്ണൂര്‍ റേഷന്‍ കടയില്‍ 10 കിലോ പഞ്ചസാരയും നശിച്ചതായി അസി.സപ്ലൈ ഓഫിസര്‍ ബഷീര്‍ പറഞ്ഞു. വര്‍ഷങ്ങളായി ആവശ്യപ്പെടുന്ന താലൂക്കിലെ റീസര്‍വ്വേ പ്രശ്‌നങ്ങള്‍ക്ക് ഇതുവരെ പരിഹാരം കാണാനായില്ലെന്ന ആരോപണവും താലൂക്ക് വികസനസമിതിയോഗത്തിലുയര്‍ന്നു. 8400 റീസര്‍വ്വേ അപേക്ഷകളാണ് നിലവില്‍ ലഭിച്ചിട്ടുള്ളതെന്നും ഏഴ് മാസത്തിനകം ഇവയെല്ലാം പരിഗണിക്കാമെന്നും വികസനസമിതി യോഗത്തില്‍ റീസര്‍വ്വേ അധികൃതര്‍ പറഞ്ഞു. ഒറ്റപ്പാലത്ത് ഫയര്‍ സ്റ്റേഷന്‍ സ്ഥാപിക്കാനായി എം.എല്‍.എ പി ഉണ്ണിയുടെ നേതൃത്വത്തില്‍ ഫയര്‍ ഡിവിഷന്‍ ഓഫിസറെയും ഉള്‍പ്പെടുത്തി ഒരാഴ്ചക്കകം യോഗം ചേരുമെന്നും സ്ഥലം കണ്ടെത്തുന്നതില്‍ നടപടിയുണ്ടാകുമെന്നും തഹസില്‍ദാര്‍ പറഞ്ഞു.
വെള്ളപ്പൊക്കത്തിനു ശേഷമുള്ള ആരോഗ്യപ്രശ്‌നങ്ങള്‍ ചര്‍ച്ചചെയ്യാന്‍ ആരോഗ്യവിഭാഗം അധികൃതര്‍ ഇല്ലാത്തത് വിമര്‍ശനത്തിന് ഇടയാക്കി. മാന്നന്നൂരിലെ ഉരുക്കുതടയണ വീണ്ടും പരിശോധിക്കാന്‍ നിര്‍ദ്ദേശം നല്‍കി. വെള്ളപൊക്കത്തില്‍ പാര്‍ശ്വഭിത്തികളിടിഞ്ഞ് സ്ഥലം വീണ്ടും പരിശോധിച്ച് പദ്ധതി രേഖതയ്യാറാക്കാന്‍ ജലസേചന വകുപ്പിന് താലൂക്ക് വികസനസമിതിയോഗം നിര്‍ദേശം നല്‍കി.
ഒറ്റപ്പാലം താലൂക്കിലെ 12 വില്ലേജുകളെ പ്രളയബാധിത വില്ലേജുകളായി ജില്ലാ കലക്ടര്‍ പ്രഖ്യാപിച്ചിട്ടുള്ളത്. ഒറ്റപ്പാലത്തെയും ഷൊര്‍ണ്ണൂരിലെയും തൃക്കടീരിയിലെയും രണ്ട് വില്ലേജുകള്‍ വീതവും കരിമ്പുഴ രണ്ട്, ചെര്‍പ്പുളശ്ശേരി, അമ്പലപ്പാറ രണ്ട്, കടമ്പഴി പ്പുറം രണ്ട്, ശ്രീകൃഷ്ണ പുരം ഒന്ന്, ചളവറ എന്നീ വില്ലേജുകളാണ് പ്രളയബാധിത വില്ലേജുകളായി കണക്കാക്കിയിട്ടുള്ളത്. ഇവിടങ്ങളില്‍ സൗജന്യ റേഷന്‍ വിതരണം നടക്കും. അഞ്ച് കിലോ അരി വീതം സൗജന്യമായി നല്‍കുമെന്ന് ഒറ്റപ്പാലം താലൂക്ക് സപ്ലൈ ഓഫിസര്‍ പറഞ്ഞു.
താലൂക്കിലെ രണ്ട് വില്ലേജുകളെക്കൂടി പ്രളയബാധിത പട്ടികയില്‍ ഉള്‍പ്പെടുത്തണമെന്ന ആവശ്യവും ഒറ്റപ്പാലം താലൂക്ക് വികസന സമിതി യോഗത്തില്‍ ഉയര്‍ന്നിരുന്നു. വാണിയംകുളം പഞ്ചായത്ത് വൈസ് പ്രസിഡന്റ് കെ ഭാസ്‌ക്കരന്‍ അധ്യക്ഷനായി. തഹസില്‍ദാര്‍ എസ്. ബിജു, അഡീഷണല്‍ തഹസില്‍ദാര്‍ പി.പി ഷീല, ഡെപ്യൂട്ടി തഹസില്‍ദാര്‍ സി.എം അബ്ദുള്‍ മജീദ്, പഞ്ചായത്ത് പ്രസിഡന്റുമാര്‍ സംസാരിച്ചു.