സ്വന്തം ലേഖകന്‍

കൊണ്ടോട്ടി: തദ്ദേശ സ്ഥാപനങ്ങള്‍ ചെലവഴിച്ച 6898 പദ്ധതികളുടെ 182.66 കോടി രൂപയുടെ ബില്ലുകള്‍ ട്രഷറി നിയന്ത്രണത്തില്‍ കെട്ടിക്കിടക്കുന്നു. ട്രഷറികളില്‍ വലിയ പദ്ധതികളുടെ ഫണ്ടുകള്‍ മാറി നല്‍കാതായതോടെയാണ് ബില്ലുകള്‍ കെട്ടിക്കിടക്കാന്‍ കാരണം. 

കൊവിഡിനെ തുടര്‍ന്ന് സര്‍ക്കാറിന്റെ ചെലവുചുരുക്കല്‍ ട്രഷറികളിലും നിയന്ത്രണമേര്‍പ്പെടുത്തിയിരിക്കുകയാണ്. പ്രവര്‍ത്തികള്‍ പൂര്‍ത്തീകരിച്ച കരാറുകാരും ഇതോടെ പണം ലഭിക്കാതെ വെട്ടിലായി.

നടപ്പു സാമ്പത്തിക വര്‍ഷം 7212.83 കോടിയുടെ പദ്ധതികളാണ് തദ്ദേശ സ്ഥാപനങ്ങള്‍ പൂര്‍ത്തീകരിക്കേണ്ടത്. ഇവയില്‍ 2222.10 കോടിയുടെ പദ്ധതികളാണ്(30.81 ശതമാനം) ഇതുവരെ പൂര്‍ത്തിയാക്കിയത്. ട്രഷറിയില്‍ കെട്ടിക്കിടക്കുന്ന ഫണ്ട് കൂടി ലഭ്യമായാല്‍ പദ്ധതി നിര്‍വഹണം 32.64 ശതമാനത്തിലെത്തും.പൂര്‍ത്തീകരിച്ച പദ്ധതികളുടെയും മെയിന്റനന്‍സ് ഗ്രാന്‍ഡും ഉള്‍പ്പടെയാണ് 182 കോടി രൂപയുടെ ബില്ലുകള്‍ ട്രഷറിയില്‍ കെട്ടിക്കിടക്കുന്നത്.