റിയാദ്: സഊദി അറേബ്യ ഇന്ന് തൊണ്ണൂറിന്റെ നിറവിലാണ്. സുശക്തമായൊരു സമ്പദ് വ്യവസ്ഥയുമായാണ് സഊദി ലോകത്തിന്റെ നെറുകയിൽ സൽമാൻ ബിൻ അബ്ദുൽ അസീസ് രാജാവിലും കിരീടാവകാശി മുഹമ്മദ് ബിൻ സൽമാൻ ബിൻ അബ്ദുൽ അസീസ് രാജ കുമാരന്റെയും കൈകളിൽ ഭരണം എത്തി നിൽക്കുന്നത്. ലോക സാമ്പത്തിക, ആയുധ ശക്തികളുടെ കൂട്ടായ്‌മയായ ജി 20 സംഘത്തിന്റെ അധ്യക്ഷ പദവി വഹിക്കുന്നത് വരെയെത്തി കാര്യങ്ങൾ. സഊദിയുടെ സാമ്പത്തിക, ആയുധ ബലം അംഗീകരിച്ചതായാണ് ഇത് വെളിപ്പെടുത്തുന്നത്. ആഗോള ഭീമന്മാർക്കൊപ്പം കൈകോർത്ത് മുന്നേറാനാകുമെന്ന് ലോകത്തിന് കാണിച്ചു കൊടുത്ത ഭരണാധികാരികളുടെ നേതൃമികവിന്റെ നേർ ചിത്രമാണ് ഇന്ന് സഊദി അറേബ്യ ലോകത്തിനു സമ്മാനിക്കുന്നത്.

     തൊണ്ണൂറാമത് സഊദി ദേശീയ ദിനതോടനുബന്ധിച്ച് രാജ്യത്താകമാനം വിപുലമായ പരിപാടികളാണ് നടക്കുന്നത്. ആഘോഷങ്ങളുടെ ഭാഗമായി "ഉയരം വരെ മനക്കരുത്തോടെ" എന്ന തലക്കെട്ടിൽ 26 വരെ നീണ്ടു നിൽക്കുന്ന ആഘോഷ പരിപാടികൾക്ക് ഇന്നലെ തുടക്കമായി. പാതയോരങ്ങളും നഗരികളും ഹരിത ലൈറ്റുകളും ദേശീയ പതാകയും കൊണ്ട് അലങ്കരിച്ചിട്ടുണ്ട്. പച്ചയിൽ വിശ്വാസവാചകം ആലേഖനം ചെയ്ത കൊടി തോരണങ്ങൾ കൊണ്ടും ദീപാലങ്കാരങ്ങൾ കൊണ്ടും നാടും നഗരവും അണിഞ്ഞൊരുങ്ങി നിൽക്കുന്നു. കൂടാതെ വിവിധ പരമ്പരാഗത കലാ സാംസ്കാരിക പരിപാടികളും നടക്കുന്നുണ്ട്. സഊദി എന്റർടൈൻമെന്റ് അതോറിറ്റിക്ക് കീഴിലും വിവിധ വകുപ്പുകൾക്ക് കീഴിലുമായി നടക്കുന്ന ആഘോഷങ്ങളുടെ ഭാഗമായി ദേശീയ ദിനത്തിൽ രാജ്യത്തെ ഏറ്റവും വലിയ എയർഷോയും നടക്കും. സെപ്‌തംബർ 23 ന് വൈകീട്ട് നാലിനു നടക്കുന്ന എയർ ഷോ സഊദി ചരിത്രത്തിലെ ഏറ്റവും വലിയതായിരിക്കും.

     കൂടാതെ, 'ജന്മനാടിനു വേണ്ടി പാടുന്നു' എന്ന വേറിട്ട പരിപാടിയും ഇത്തവണ ഒരുക്കിയിട്ടുണ്ട്. കൊവിഡ് പശ്ചാത്തലത്തിൽ ആരോഗ്യ സുരക്ഷ മുൻകരുതൽ പാലിച്ചാണ് വിവിധ പരിപാടികൾ. അന്നം തരുന്ന നാടിനു ആശംസകളർപ്പിച്ചും പ്രാർത്ഥനയുമായി മലയാളികളടക്കമുള്ള വിദേശികളും ഏറെ മുന്നിലാണ്. രക്തദാന പരിപാടികൾ ഉൾപ്പെടെ വിവിധ പരിപാടികളും മലയാളി സംഘടനകൾ സജ്ജീകരിച്ചിട്ടുണ്ട്.