കൊല്‍ക്കത്ത: പശ്ചിമബംഗാളില്‍ 17കാരിയെ ലൈംഗികമായി പീഡിപ്പിച്ചെന്ന പരാതിയില്‍ ബിജെപി സ്ഥാനാര്‍ഥിക്കെതിരേ പോക്‌സോ നിയമപ്രകാരം കേസ്. ഡയമണ്ട് ഹാര്‍ബറില്‍ നിന്നുള്ള ബിജെപി സ്ഥാനാര്‍ഥി നീലാഞ്ജന്‍ റോയ്‌ക്കെതിരേയാണ് പോക്‌സോ പ്രകാരം കേസെടുത്തത്. കഴിഞ്ഞമാസം 26ന് ഇയാള്‍ 17കാരിയായ പെണ്‍കുട്ടിയെ ലൈംഗികമായി പീഡിപ്പിച്ചെന്ന് പരാതി ലഭിച്ചതായി സംസ്ഥാന ബാലാവകാശ കമ്മീഷന്‍ വ്യക്തമാക്കി. 'ഫാല്‍ട പോലിസ് സ്‌റ്റേഷനിലാണ് പെണ്‍കുട്ടി പരാതി നല്‍കിയത്. പെണ്‍കുട്ടിയുടെ മൊഴി രേഖപ്പെടുത്തി. വൈദ്യ പരിശോധനയ്ക്ക് വിധേയമാക്കുകയും ചെയ്തു. പക്ഷേ പോലിസ് ഇതുവരെ നീലാഞ്ജന്‍ റോയിയെ അറസ്റ്റ് ചെയ്തിട്ടില്ല'- ബാലാവകാശ കമ്മീഷന്‍ ചെയര്‍ പേഴ്‌സണ്‍ അനന്യ ചാറ്റര്‍ജി ചക്രബോര്‍തി അറിയിച്ചു.