ബംഗളൂരു: റോയല്‍ ചലഞ്ചേഴ്‌സ് ബാംഗ്ലൂരിന്റെ കഷ്ടകാലത്തിന് സ്വന്തം മണ്ണിലും പരിഹാരമില്ല. എതിരാളികളെ കുറഞ്ഞ സ്‌കോറില്‍ പുറത്താക്കിയിട്ടും മത്സരം വിജയിക്കാനാകാതെ പേരുകേട്ട അവരുടെ ബാറ്റ്‌സ്മാന്‍മാരെല്ലാം പൊരുതാന്‍ പോലും ശ്രമിക്കാതെ കീഴടങ്ങിയപ്പോള്‍ കിങ്‌സ് ഇലവന്‍ പഞ്ചാബ് അഞ്ചാം ജയത്തോടെ പ്ലേയോഫ് പ്രതീക്ഷകള്‍ കാത്തു. 19 റണ്‍സിനാണ് പഞ്ചാബ് വിജയം സ്വന്തമാക്കിയത്.
ആദ്യം ബാറ്റ് ചെയ്ത പഞ്ചാബിനെ മികച്ച ബൗളിങിലൂടെ ബാംഗ്ലൂര്‍ 20 ഓവറില്‍ ഏഴ് വിക്കറ്റിന് 138ല്‍ ഒതുക്കി. വിജയം തേടിയിറങ്ങിയ അവരുടെ പോരാട്ടം 19 ഓവറില്‍ 119 റണ്‍സില്‍ അവസാനിച്ചു. കൂറ്റനടിക്കാരായ ക്രിസ് ഗെയില്‍ (പൂജ്യം), നായകന്‍ വിരാട് കോഹ്‌ലി (ആറ്), ഡിവില്ല്യേഴ്‌സ് (10), വാട്‌സന്‍ (മൂന്ന്) എന്നിവരെല്ലാം ക്ഷണത്തില്‍ കൂടാരം കയറിയതോടെ ബാംഗ്ലൂരിന്റെ വിധി തീരുമാനിക്കപ്പെട്ടു. മികച്ച ബാറ്റിങുമായി കളം നിറഞ്ഞ മന്‍ദീപ് ശര്‍മയുടെ ഒറ്റയാള്‍ പ്രകടനം പഞ്ചബിന് തലവേദനായായി. എന്നാല്‍ പന്തെടുത്ത നായകന്‍ മാക്‌സ്‌വെല്‍ തന്റെ ആദ്യ പന്തില്‍ തന്നെ മന്‍ദീപിനെ ക്ലീന്‍ ബൗള്‍ഡാക്കി ആ വെല്ലുവിളി അവസാനിപ്പിച്ചു. 40 പന്തില്‍ അഞ്ച് ഫോറും രണ്ട് സിക്‌സും പറത്തി മന്‍ദീപ് 46 റണ്‍സെടുത്തു. പിന്നീട് പവന്‍ നേഗി 21 റണ്‍സുമായി മികവ് പുലര്‍ത്തിയെങ്കിലും ആരും പിന്തുണക്കാനില്ലാതെ പോയി. മൂന്നോവറില്‍ 11 റണ്‍സ് വഴങ്ങി മൂന്ന് വിക്കറ്റ് വീഴ്ത്തിയ അക്‌സര്‍ പട്ടേല്‍ മൂന്ന് വിക്കറ്റെടുത്ത സന്ദീപ് ശര്‍മ രണ്ട് വീതം വിക്കറ്റ് വീഴ്ത്തിയ മാക്‌സ്‌വെല്‍, മോഹിത് ശര്‍മ എന്നിവര്‍ മികച്ച ബൗളിങ് പുറത്തെടുത്തു.
ടോസ് നേടി ബാംഗ്ലൂര്‍ ബൗളിങ് തിരഞ്ഞെടുക്കുകയായിരുന്നു. അച്ചടക്കത്തോടെ പന്തെറിഞ്ഞ ബാംഗ്ലൂര്‍ ബൗളര്‍മാര്‍ പഞ്ചാബിനെ വരിഞ്ഞിട്ടതോടെ അവര്‍ക്ക് റണ്‍സ് കണ്ടെത്താന്‍ ബുദ്ധിമുട്ടേണ്ടി വന്നു. വാലറ്റത്ത് അക്‌സര്‍ പട്ടേല്‍ നടത്തിയ മിന്നലാക്രമണമാമ് അവരുടെ സ്‌കോര്‍ പൊരുതാവുന്ന നിലയിലെത്തിച്ചത്. അക്‌സര്‍ 17 പന്തില്‍ മൂന്ന് ഫോറും രണ്ട് സിക്‌സും പറത്തി 38 റണ്‍സെടുത്തു. മനന്‍ വോറ (25). വൃദ്ധിമാന്‍ സാഹ (21), ഷോണ്‍ മാര്‍ഷ് (20) എന്നിവരും രണ്ടക്കം കടന്നു. ബാംഗ്ലൂരിനായി അങ്കിത് ചൗധരി, യുസ്‌വേന്ദ്ര ചഹല്‍ എന്നിവര്‍ രണ്ട് വീതം വിക്കറ്റുകള്‍ വീഴ്ത്തി.