തൃക്കരിപ്പൂര്‍: വാഹനത്തില്‍ ഉരസിയെന്ന് ആരോപിച്ചു രോഗബാധിതനായ ലോറിഡ്രൈവറെ വലിച്ചു പുറത്തിട്ടു മര്‍ദിച്ചു. ഡ്രൈവറെ തല്ലിച്ചതക്കുന്ന ദൃശ്യം മൊബൈലില്‍ പകര്‍ത്തി സമൂഹമാധ്യമങ്ങളില്‍ പ്രചരിപ്പിക്കുകയും ചെയ്തു. മര്‍ദനത്തില്‍ ഡ്രൈവര്‍ അവശനായി റോഡില്‍ വീണു. കഴിഞ്ഞ ദിവസം രാത്രി വടക്കുമ്പാടുള്ള കൊയോങ്കര മൃഗാശുപത്രിക്കു മുന്നിലെ റോഡിലാണ് സംഭവം. എട്ടിക്കുളം പാലക്കോട് താമസിക്കുന്ന മാടായി സ്വദേശി മുഹമ്മദ് മന്‍സൂറിനാ(55)ണ് മര്‍ദനമേറ്റത്. സംഭവം സംബന്ധിച്ച് ചന്തേര പൊലിസ് 308 വകുപ്പ് പ്രകാരം വധശ്രമത്തിനു കേസെടുത്തു. പൂച്ചോല്‍ റിയാസിനെ പൊലിസ് രാത്രിയില്‍ തന്നെ പിടികൂടിയിരുന്നു. കൂട്ടുപ്രതികളായ നൂറുദ്ദീന്‍, സൈനുദ്ദീന്‍ എന്നിവര്‍ ഓടിരക്ഷപ്പെട്ടിരുന്നുവെങ്കിലും സൈനുദ്ദീനെ ഇന്നലെ ഉച്ചയോടെ പിടികൂടി. നൂറുദ്ദീനെ കണ്ടെത്താനുള്ള അന്വേഷണം ഊര്‍ജിതമാക്കിയതായി ചന്തേര എസ്.ഐ വിപിന്‍ ചന്ദ്രന്‍ പറഞ്ഞു. സാരമായി പരുക്കേറ്റ മന്‍സൂറിനെ പോലിസ് ചെറുവത്തൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു.
സ്ഥലത്തെത്തിയ മാധ്യമ പ്രവര്‍ത്തകര്‍ വിവരം അറിയിച്ചത് പ്രകാരം പത്തോടെ സ്ഥലത്തെത്തിയ ചന്തേര എ.എസ്.ഐ ബാവയുടെ നേതൃത്വത്തിലുള്ള പൊലിസ് സംഘം നിലത്ത് വീണുകിടന്ന ഡ്രൈവര്‍ മന്‍സൂറിനെ അക്രമികളില്‍ നിന്നുരക്ഷപ്പെടുത്തി പൊലിസ് വാഹനത്തില്‍ സ്റ്റേഷനിലേക്ക് കൊണ്ടുപോവുകയും അവിടെ നിന്ന് ആശുപത്രിയിലേക്കുമാറ്റുകയുമായിരുന്നു.
എട്ടിക്കുളത്തുനിന്നു മംഗളരുവിലേക്കു മീന്‍ കയറ്റി പോവുകയായിരുന്ന മന്‍സൂര്‍ ഓടിച്ചിരുന്ന ലോറിക്ക് കാലിക്കടവ് ഭാഗത്തുനിന്ന് അതിവേഗം ഓടിച്ചുവന്ന കെ.എല്‍ 60 കെ 9239 നമ്പര്‍ മാരുതി സ്വിഫ്റ്റ് കാര്‍ ഇടിക്കുകയായിരുന്നു.
തുടര്‍ന്നാണ് കാറില്‍ ഉണ്ടായിരുന്ന യുവാവിന്റെ നേതൃത്വത്തില്‍ ഒരു സംഘം ചാടിയിറങ്ങി ഡ്രൈവര്‍ക്കെതിരേ അക്രമം നടത്തിയത്.