തിരുവനന്തപുരം: സംസ്ഥാന സ്‌പോര്‍ട്‌സ് കൗണ്‍സില്‍ പ്രസിഡന്റായി ടി.പി ദാസന്‍ ചുമതലയേറ്റു. ഒളിംപ്യന്‍ അഞ്ജു ബോബി ജോര്‍ജ് കൗണ്‍സില്‍ പ്രസിഡന്റ് സ്ഥാനം രാജിവച്ചതിനെ തുടര്‍ന്നാണ് ദാസന്‍ ചുമതലയേറ്റത്. ഒളിംപ്യന്‍ മേഴ്‌സിക്കുട്ടന്‍ വൈസ് പ്രസിഡന്റായും ചുമതലയേറ്റു.  

കെ.സി ലേഖ, ജോര്‍ജ് തോമസ്, എസ് രാജീവ്, എം.ആര്‍ രഞ്ജിത്ത്, ഡി വിജയകുമാര്‍, ഒ.കെ വിനീത് , ഐ.ടി മനോജ് എന്നിവരാണ് സമിതിയിലെ മറ്റംഗങ്ങള്‍. കഴിഞ്ഞ എല്‍.ഡി.എഫ് സര്‍ക്കാരിന്റെ കാലത്തെ സ്‌പോര്‍ട്്്‌സ് കൗണ്‍സിലിന്റെ തുടര്‍ച്ചയാകും പുതിയ കൗണ്‍സിലെന്ന്്് ടി.പി ദാസന്‍ പറഞ്ഞു. കഴിഞ്ഞ പത്തു വര്‍ഷക്കാലത്തെ കൗണ്‍സിലിന്റെ പ്രവര്‍ത്തനങ്ങള്‍ അന്വേഷിക്കുന്ന വിജിലന്‍സ് സംഘവുമായി പൂര്‍ണമായും സഹകരിക്കുമെന്നും അദ്ദേഹം വ്യക്തമാക്കി.

മുന്‍ എല്‍.ഡി.എഫ് സര്‍ക്കാരിന്റെ കാലത്തും സ്‌പോര്‍ട്‌സ് കൗണ്‍സില്‍ പ്രസിഡന്റായിരുന്നു ടി.പി ദാസന്‍. അന്ന്് സ്‌പോര്‍ട്‌സ് ലോട്ടറിയുടെ നടത്തിപ്പുമായി ബന്ധപ്പെട്ട് ആരോപണങ്ങള്‍ നേരിട്ടിരുന്നു. സര്‍ക്കാരുമായുള്ള അഭിപ്രായ വ്യത്യാസങ്ങളും അഴിമതി ആരോപണങ്ങളും ഉയര്‍ന്നതിനെ തുടര്‍ന്നാണ് മുന്‍ പ്രസിഡന്റ് അഞ്ജു ബോബി ജോര്‍ജ് സ്ഥാനമൊഴിഞ്ഞത്.