കല്‍പ്പറ്റ: വയനാട് കലക്ടറേറ്റിന് മുന്നില്‍ നടക്കുന്ന തൊവരിമല ഭൂസമരം ഒത്തുതീര്‍പ്പാക്കാന്‍ ജില്ലാ കലക്ടര്‍ വിളിച്ച രണ്ടാമത്തെ ചര്‍ച്ചയും തീരുമാനമാകാതെ പിരിഞ്ഞു. റവന്യൂ വകുപ്പിന്റെ നിര്‍ദേശ പ്രകാരമാണ് വയനാട് കലക്ടര്‍ എ.ആര്‍ അജയകുമാര്‍ ഇന്നലെ സമരക്കാരുമായി ചര്‍ച്ച നടത്തിയത്.

29ന് റവന്യൂ സെക്രട്ടറി വിളിച്ചുചേര്‍ക്കുന്ന കലക്ടര്‍മാരുടെ യോഗത്തില്‍ വയനാട് ജില്ലയിലെ ആദിവാസികള്‍ക്ക് വീട്‌വയ്ക്കാനുള്ള ഭൂമി നല്‍കുന്ന കാര്യത്തില്‍ തീരുമാനമെടുക്കുമെന്നും അതിനാല്‍ സമരം പിന്‍വലിക്കണമെന്നും ആവശ്യപ്പെട്ടു. ആവശ്യങ്ങളില്‍ വിട്ടുവീഴ്ചയില്ലെന്നും ആവശ്യം പരിഗണിച്ചില്ലെങ്കില്‍ സമരവുമായി മുന്നോട്ട് പോകുമെന്നും സമരസമിതി നേതാക്കള്‍ പറഞ്ഞു.
സി.പി.ഐ (എം.എല്‍) റെഡ്സ്റ്റാര്‍ സംസ്ഥാന സെക്രട്ടറി എം.കെ ദാസന്‍, എ.എം സ്മിത, ആദിവാസി കുടുംബ പ്രതിനിധികളായ വെളിയന്‍, ജാനകി, കല്യാണി എന്നിവരാണ് കലക്ടറുമായുള്ള ചര്‍ച്ചയില്‍ പങ്കെടുത്തത്.