കല്‍പ്പറ്റ: തൊവരിമല ഭൂസമരത്തെ തുടര്‍ന്ന് അറസ്റ്റിലായ ഭൂസമരസമിതി നേതാക്കള്‍ക്ക് ഹൈക്കോടതി ഉപാധികളോടെ ജാമ്യം അനുവദിച്ചു. ഭൂസമരസമിതിയുടെ കണ്‍വീനറും സി.പി.ഐ(എം.എല്‍) റെഡ്സ്റ്റാര്‍ കേന്ദ്ര കമ്മിറ്റി അംഗവുമായ എം.പി കുഞ്ഞിക്കണാരന്‍, രാജേഷ് അപ്പാട്ട്, കെ.ജി മനോഹരന്‍ എന്നിവര്‍ക്കാണ് ജാമ്യം അനുവദിച്ചത്.
എം.പി കുഞ്ഞിക്കണാരന്‍, രാജേഷ് അപ്പാട്ട് എന്നിവര്‍ അഞ്ചുമാസത്തേക്ക് വയനാട്ടില്‍ പ്രവേശിക്കരുതെന്നും കെ.ജി മനോഹരന്‍ തൊവരിമലയില്‍ പോകരുതുമെന്ന ഉപാധികളോടെയാണ് ജാമ്യം. തൊവരിമലയില്‍ ആദിവാസികളും ഭൂരഹിതരും കുടില്‍ കെട്ടി നടത്തിയ സമരത്തെ തുടര്‍ന്ന് കഴിഞ്ഞ ഏപ്രില്‍ 24നാണ് സമരക്കാരെ പൊലിസ് ബലമായി നീക്കം ചെയ്യുകയും നേതാക്കളെ അറസ്റ്റ് ചെയ്യുകയും ചെയ്തത്.
നേതാക്കള്‍ക്ക് ഇന്ന് കണ്ണൂര്‍ സെന്‍ട്രല്‍ ജയില്‍ കവാടത്തില്‍ ആദിവാസി നേതാവ് പി. വളിയന്റെ നേതൃത്വത്തില്‍ സ്വീകരണം നല്‍കും.
നേതാക്കള്‍ക്ക് ജാമ്യം അനുവദിച്ചതിനെ തുടര്‍ന്ന് കല്‍പ്പറ്റ കലക്ടറേറ്റിന് മുന്നില്‍ ആരംഭിച്ച റിലേ നിരാഹാര സമരം അവസാനിപ്പിച്ചു. അതേസമയം, ഭൂരഹിതരായ ആദിവാസികള്‍ക്കും മറ്റുള്ളവര്‍ക്കും രണ്ടേക്കര്‍ വീതം കൃഷിഭൂമി നല്‍കണമെന്നാവശ്യപ്പെട്ട് പ്രക്ഷോഭം തുടരാനും കലക്ടറേറ്റിന് മുന്നിലെ സമരം തുടരാനുമാണ് സമരസമിതി തീരുമാനം.