തിരുവനന്തപുരം: തദ്ദേശ സ്വയംഭരണ തെരഞ്ഞെടുപ്പ് നേരിടാനുള്ള പ്രവര്‍ത്തനപരിപാടികള്‍ക്ക് ഇന്നലെ ചേര്‍ന്ന യു.ഡി.എഫ് ഉപസമിതി രൂപം നല്‍കി. ഉപസമിതിയുടെ ശുപാര്‍ശകള്‍ ഈ മാസം 15നു ചേരുന്ന സംസ്ഥാന ഏകോപന സമിതിയില്‍ ചര്‍ച്ച ചെയ്തു തീരുമാനിക്കുമെന്നു മുന്നണി കണ്‍വീനര്‍ എം.എം ഹസന്‍ അറിയിച്ചു.

എല്‍.ഡി.എഫ് സര്‍ക്കാര്‍ തദ്ദേശ സ്വയംഭരണ സ്ഥാപനങ്ങളെ സാമ്പത്തികമായും ഭരണപരമായും ശ്വാസംമുട്ടിച്ചു കൊല്ലാന്‍ ശ്രമിച്ചെന്നു യോഗം ആരോപിച്ചു.

പ്രളയകാലത്ത് കൊവിഡ് ദുരിതാശ്വാസത്തിനും രോഗപ്രതിരോധത്തിനും ആവശ്യമായ ഫണ്ട് നല്‍കാതെ തദ്ദേശസ്ഥാപനങ്ങളെ തകര്‍ത്തെന്നും യോഗത്തില്‍ വിമര്‍ശനമുയര്‍ന്നു. 

അതേസമയം കേരള കോണ്‍ഗ്രസ് ജോസ് വിഭാഗത്തില്‍പെട്ടവര്‍ മത്സരിച്ച സീറ്റുകളില്‍ എന്തു നിലപാട് സ്വീകരിക്കുമെന്നതില്‍ കാര്യമായ ചര്‍ച്ചയുണ്ടായില്ല. ആ വിഷയത്തില്‍ ഇനി ചര്‍ച്ചയ്ക്ക് പ്രസക്തിയില്ലെന്ന് എം.എം ഹസന്‍ പറഞ്ഞു.

പ്രതിപക്ഷനേതാവ് രമേശ് ചെന്നിത്തലയുടെ അദ്ധ്യക്ഷതയില്‍ ചേര്‍ന്ന യോഗത്തില്‍ എം. ഉമ്മര്‍, വി.ഡി സതീശന്‍, മോന്‍സ് ജോസഫ് അനൂപ് ജേക്കബ്, ഷാനിമോള്‍ ഉസ്മാന്‍, സി.പി. ജോണ്‍, ഷിബു ബേബി ജോണ്‍, മഞ്ഞളാംകുഴി അലി, എന്‍. വേണുഗോപാല്‍ തുടങ്ങിയവര്‍ വിഡിയോ കോണ്‍ഫറന്‍സ് വഴി സംബന്ധിച്ചു.