കോഴിക്കോട്: മലയാളി സോഷ്യല്‍മീഡിയാ സമൂഹത്തിന്റെ പ്രാര്‍ഥനയും കരുതലും ഫലിച്ചു. ട്രെയിന്‍ യാത്രയ്ക്കിടെ 17 കാരിയായ മകളെ കാണാനില്ലെന്ന ഒരച്ഛന്റെ കണ്ണീരണിഞ്ഞ ഫേസ്ബുക്ക് പോസ്റ്റായിരുന്നു കഴിഞ്ഞ രണ്ടുദിവസമായി കേരളത്തിലെ ഫേസ്ബുക്കിലും വാട്‌സാപ്പിലും ഏറ്റവുമധികം ഷെയര്‍ചെയ്യപ്പെട്ടത്. ആ കരുതലിന് ഇന്നലെ ഫലം കണ്ടതായി വയനാട് കാക്കവയല്‍ സ്വദേശിയായ അച്ഛന്‍ തന്നെ അറിയിച്ചു. 'മകളെ കിട്ടി.. പ്രാര്‍ഥനകള്‍ക്കും അന്വേഷണങ്ങള്‍ക്കും നന്ദി' അച്ഛന്‍ ശിവജി ഫെയ്‌സ്ബുക്കില്‍ കുറിച്ചു. രാത്രി 11 മണിയോടെ ചടയമംഗലത്ത് വച്ച് കണ്ടെത്തിയെന്നാണ് അയല്‍വാസി പങ്കുവച്ചിരിക്കുന്നത്. കൂടുതല്‍ വിവരങ്ങള്‍ വെളിപ്പെടുത്തിയിട്ടില്ല. വിഷ്ണുപ്രിയയെ കണ്ടെത്തിയതായി അയല്‍വാസിയായ നൗഷാദും അറിയിച്ചു.

ചോറ്റാനിക്കരയുള്ള അമ്മവീട്ടില്‍ നിന്നും വയനാട് കാക്കവയലുള്ള വീട്ടിലേക്ക് തിരിച്ചതാണ് വിഷ്ണുപ്രിയ. വെള്ളിയാഴ്ച രാത്രി എറണാകുളത്തു നിന്നുമുള്ള ട്രെയിനിലാണ് തിരിച്ചത്. രാവിലെ ആറു മണിക്ക് കോഴിക്കോട് റെയില്‍വേ സ്റ്റേഷനില്‍ എത്തേണ്ടതായിരുന്നു. പക്ഷേ അവിടെ കുട്ടി ഇറങ്ങിയില്ല. അപ്പോള്‍ മുതല്‍ പലവഴിക്ക് അന്വേഷിക്കുകയായിരുന്നു. വയനാട് മീനങ്ങാടി പൊലീസ് സ്റ്റേഷനിലും ചോറ്റാനിക്കര സ്റ്റേഷനിലും പരാതി നല്‍കിയിരുന്നു. ഇതിന് പിന്നാലെയാണ് അച്ഛന്‍ ഫേസ്ബുക്കിലും കുറിപ്പിട്ടത്. വിഷ്ണുപ്രിയ ഫോണ്‍ ഉപയോഗിക്കാത്തതും കണ്ടുപിടിക്കുന്നതില്‍ ബുദ്ധിമുട്ടുണ്ടായിരുന്നു. റെയില്‍വെ പൊലീസാണ് കുട്ടിയെ കണ്ടെത്താന്‍ സഹായിച്ചത്.