തിരുവനന്തപുരം: പ്രളയക്കെടുതിയില്‍ തകര്‍ന്ന സംസ്ഥാനത്തിന്റെ പുനിര്‍നിര്‍മാണത്തിനായി മുഖ്യമന്ത്രിയുടെ ദുരിതാശ്വാസ നിധിയിലേക്ക് നിര്‍ബന്ധിത പിരിവ് പാടില്ലെന്ന നിര്‍ദേശവുമായി ചീഫ് സെക്രട്ടറി ജോസ്. സര്‍ക്കാര്‍ ജീവനക്കാര്‍ ഒരു മാസത്തെ ശമ്പളം ദുരിതാശ്വാസ നിധിയിലേക്ക് നല്‍കണമെന്ന ഉത്തരവില്‍ നിര്‍ബന്ധിതമായി പിരിക്കുന്നുണ്ടെന്നുമുള്ള നിരവധി പരാതികള്‍ ഉയര്‍ന്ന പശ്ചാത്തലത്തിലാണ് ചീഫ് സെക്രട്ടറിയുടെ പ്രതികരണം.

ദുരിതാശ്വാസ നിധിയിലേക്ക് ആരെയും നിര്‍ബന്ധിപ്പിച്ച് പണം വാങ്ങാന്‍ പാടില്ല. സ്വമേധയാ നല്‍കുന്ന പണമാണ് സ്വരൂപിക്കേണ്ടത്. വകുപ്പു മേധാവികളും കലക്ടര്‍മാരും നിര്‍ദേശം കര്‍ശനമായി പാലിക്കണമെന്നും ചീഫ് സെക്രട്ടറി ഉത്തരവില്‍ പറയുന്നു.

സര്‍ക്കാര്‍ ജീവനക്കാര്‍ ഒരു മാസത്തെ ശമ്പളം മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്‍കണമെന്ന ഉത്തരവ് ഗുണ്ടാപ്പിരിവാണെന്ന് കെ.പി.സി.സി അധ്യക്ഷന്‍ എം.എം ഹസന്‍ ആരോപിച്ചിരുന്നു. താല്‍പ്പര്യമില്ലാത്തവര്‍ അത് എഴുതി നല്‍കണമെന്നുള്ള സര്‍ക്കാര്‍ ഉത്തരവ് പിന്‍വലിക്കണമെന്നും ഹസന്‍ ആവശ്യപ്പെട്ടിരുന്നു.