അടിമാലി: പൊതുമരാമത്ത് റോഡില്‍ നിന്നും വീട്ടിലേക്ക് കയറാന്‍ വഴിയില്ലാതെ ഏതാനും കുടുംബങ്ങള്‍. അടിമാലി ഗ്രാമപഞ്ചായത്തിന്റെ ഒന്നാം വാര്‍ഡില്‍ ഉള്‍പ്പെട്ട പഴമ്പള്ളിച്ചാല്‍ മേഖലയിലാണ് റോഡില്‍ നിന്നും ഉയര്‍ന്നു നില്‍ക്കുന്ന മണ്‍തിട്ട അരഡസനോളം കുടുംബങ്ങളുടെ യാത്ര മുടക്കുന്നത്.
റോഡില്‍ നിന്നും നാല് മീറ്ററോളം ഉയര്‍ന്നു നില്‍ക്കുന്ന മണ്‍തിട്ട മറികടന്ന് വേണം ഈ കുടുംബങ്ങള്‍ക്ക് വീടുകളില്‍ കയറാന്‍. മണ്‍തിട്ടയേയും റോഡിനേയും തമ്മില്‍ ബന്ധിപ്പിക്കാന്‍ തടികൊണ്ടൊള്ളൊരു താല്‍ക്കാലിക നടപ്പാലം ഒരുക്കിയിട്ടുണ്ടെങ്കിലും തങ്ങളുടെ യാത്രാക്ലേശത്തിന് അത് ശാശ്വത പരിഹാരമല്ലെന്നാണ് പരാതി.
പാലത്തിന് ബലക്ഷയം സംഭവിക്കുന്നതോടെ വര്‍ഷാവര്‍ഷം കുടുംബങ്ങള്‍ പുതിയപാലം കെട്ടണം.പരിഹാരമായി പഞ്ചായത്തിന്റെ ഭാഗത്തു നിന്നും ഉറപ്പുള്ളൊരു നാടപ്പാത നിര്‍മ്മിച്ച് നല്‍കണമെന്നാണ് ഇവരുടെ ആവശ്യം. വീതി വര്‍ധിപ്പിച്ച് ടാറിംഗ് നടത്തിയതോടെയായിരുന്നു റോഡരികിലെ മണ്‍തിട്ടക്ക് ഉയരം വര്‍ധിച്ചത്. പാറക്കെട്ടായതിനാല്‍ പ്രദേശത്ത് മണ്ണ് വെട്ടി നടപ്പാതയുണ്ടാക്കുക അസാധ്യം. സ്വന്തമായി പണംമുടക്കി പൊതുവഴി നിര്‍മ്മിക്കാനുള്ള സാമ്പത്തിക ശേഷി ഈ കുടുംബങ്ങള്‍ക്കില്ല. കുട്ടികളും പ്രായമായവരും അടക്കം ഉണങ്ങി ദ്രവിച്ച പാലത്തിലൂടെ ആയാസപ്പെട്ടാണ് നടക്കുന്നത്.
നിരവധി തവണ പഞ്ചായത്തില്‍ തങ്ങളുടെ ആവശ്യം അറിയിച്ചിട്ടും നടപടി ഉണ്ടായിട്ടില്ലെന്നും കുടുംബങ്ങള്‍ പരാതിപ്പെടുന്നു സമീപത്തായി ഒരു വൃക്തിക്ക് വേണ്ടി മാത്രം നാല് ലക്ഷത്തോളം രൂപ മുടക്കി പഞ്ചായത്ത് നടപ്പാത നിര്‍മ്മിച്ച് നല്‍കിയതിനേയും ഈ കുടുംബങ്ങള്‍ ചോദ്യം ചെയ്യുന്നു.