തിരുവനന്തപുരം: ജൈവ രീതിയില്‍ ഉല്‍പാദിപ്പിക്കുന്ന ഭക്ഷ്യവസ്തുക്കള്‍ക്ക് മികച്ച വിലയും ജൈവകര്‍ഷകര്‍ക്ക് തുടര്‍ പ്രവര്‍ത്തനങ്ങള്‍ക്ക് വേണ്ട പ്രോത്സാഹനവും യഥാസമയം നല്‍കണമെന്ന് റവന്യൂ മന്ത്രി ഇ. ചന്ദ്രശേഖരന്‍.
തന്റെ ഔദ്യോഗിക വസതിയില്‍ കൃഷി വകുപ്പിന്റെ നേതൃത്വത്തില്‍ തയ്യാറാക്കിയ പച്ചക്കറിത്തോട്ടം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. എല്ലാ മന്ത്രി മന്ദിരങ്ങളിലും  ജൈവ പച്ചക്കറി തോട്ടം തയാറാക്കുക എന്ന സര്‍ക്കാര്‍ നയത്തിന്റെ ഭാഗമായാണ് മന്ത്രി ഇ. ചന്ദ്രശേഖരന്റെ വസതിയിലും ഈ പദ്ധതിയ്ക്ക് തുടക്കം കുറിച്ചത്.
മുളക്, തക്കാളി, വഴുതിന എന്നിവ ഓട്ടോമേറ്റഡ് ഡ്രിപ്പ് സംവിധാനമുള്ള ഗ്രോബാഗുകളിലും, പയര്‍, ചീര, വെണ്ട, കുമ്പളം എന്നിവ തുറസായ സ്ഥലത്തുമാണ് നട്ടത്. ഓണക്കാലത്ത് എല്ലാ ജനങ്ങളും സ്വന്തമായി ഉല്‍പാദിപ്പിച്ച പച്ചക്കറി ഉപയോഗിക്കണമെന്നാണ് തന്റെ ആഗ്രഹമെന്ന് മന്ത്രി പറഞ്ഞു. സ്വന്തം ആവശ്യം കഴിഞ്ഞ് ബാക്കിയുള്ളവ കൃഷിവകുപ്പിന്റെ ജൈവവിപണിയായ ഇക്കോഷോപ്പിനു നല്‍കുമെന്നും അദ്ദേഹം അറിയിച്ചു.
ജൈവ ഉല്‍പന്നങ്ങള്‍ക്ക് മികച്ച വില ഉറപ്പാക്കിയാല്‍ മാത്രമേ ജൈവ കര്‍ഷകര്‍ക്ക് വേണ്ട പ്രചോദനം കിട്ടുകയുള്ളൂ. സര്‍ക്കാര്‍ തലത്തിലും വകുപ്പു തലത്തിലും ഇതിനുവേണ്ട നടപടികള്‍ സ്വീകരിക്കണം.പച്ചക്കറി ഉല്‍പാദനത്തില്‍ സംസ്ഥാനം സ്വയംപര്യാപ്തതമാകാന്‍ ഇത് സഹായിക്കും.കുടപ്പനക്കുന്ന് കൃഷി ഓഫീസര്‍ സി.എല്‍.മിനിയുടെ നേതൃത്വത്തില്‍ കാര്‍ഷിക കര്‍മ്മസേനയാണ് പച്ചക്കറി തോട്ടത്തിനു വേണ്ട സംവിധാനങ്ങള്‍ ഒരുക്കിയത്.
പ്രിന്‍സിപ്പല്‍ കൃഷി ഓഫീസര്‍ എസ്.കെ. സുരേഷ്, കൃഷി വകുപ്പിലെ മറ്റ് ഉന്നത ഉദ്യോഗസ്ഥര്‍ എന്നിവര്‍ ചടങ്ങില്‍ പങ്കെടുത്തു.