മാള: പ്രളയ ദുരിതത്തില്‍ കനത്ത നാശ നഷ്ടങ്ങള്‍ ഏറ്റുവാങ്ങിയ പായ്തുരുത്ത് പ്രദേശവാസികള്‍ക്ക് താങ്ങായി ആഘാ ഖാന്‍ ഏജന്‍സി ഫോര്‍ ഹാബിറ്റേറ്റിന്റെ സഹായമെത്തി.
രാജഗിരി കോളജ് ഓഫ് സയന്‍സിലെ ഒരു കൂട്ടം സാമൂഹ്യ പ്രവര്‍ത്തകരുടെ കൂട്ടായ്മയായ ക്യാന്‍വാസ് ചാരിറ്റബിള്‍ ട്രസ്റ്റിന്റേയും സി.എം.സി സന്യാസിനി സഭയുടേയും ശ്രമഫലമായിട്ടാണ് സഹായങ്ങള്‍ എത്തിക്കാനായത്. സമൂഹത്തില്‍ പ്രയാസങ്ങള്‍ അനുഭവിക്കുന്ന കുട്ടികളുടേയും മാതാപിതാക്കളുടേയും സംരക്ഷണം ലക്ഷ്യം വച്ച് പ്രവര്‍ത്തിക്കുന്ന ക്യാന്‍വാസ് ചാരിറ്റബിള്‍ ട്രസറ്റ് ഇതിനോടകം നിരവധി മെഡിക്കല്‍ കാംപുകളും മറ്റ് സേവന പ്രവര്‍ത്തനങ്ങളും നടത്തിയിട്ടുണ്ട് .
തൃശൂര്‍, എറണാകുളം ജില്ലകള്‍ അതിരിടുന്ന പായ്തുരുത്തില്‍ ജീവിക്കുന്ന 43 കുടുംബങ്ങള്‍ക്കും അങ്കമാലി, ആലുവ, ഇടുക്കി, ഇരിങ്ങാലക്കുട തുടങ്ങിയ പ്രദേശങ്ങളിലുമായി നാല് ടണ്‍ അരിയും മറ്റ് ആവശ്യ വസ്തുക്കളുമാണ് വിതരണം ചെയ്തത്. മുംബൈ ആസ്ഥാനമായി പ്രവര്‍ത്തിക്കുന്ന ആഘാ ഖാന്‍ ഏജന്‍സി ഫോര്‍ ഹാബിറ്റേറ്റ് ആണ് റിലീഫ് കിറ്റുകള്‍ സ്‌പോണ്‍സര്‍ ചെയ്തത്.
വീടും വീട്ടുപകരണങ്ങളും പഠനോപകരണങ്ങളും ഉള്‍പ്പെടെ സര്‍വതും നഷ്ടപ്പെട്ട പായ്തുരുത്തില്‍ വളരെ വൈകിയാണ് ഭക്ഷണ സാധനങ്ങളും മറ്റും ലഭിച്ചത് . ക്യാന്‍വാസ് ചാരിറ്റബിള്‍ ട്രസ്റ്റിന്റേയും സി.എം.സി സന്യാസിനി സഭയുടേയും ഇടപെടലാണ് പായ്തുരുത്ത്കാര്‍ക്ക് താങ്ങായത്.