കൊണ്ടോട്ടി: ശരീരത്തില്‍ സ്വര്‍ണം ഒളിപ്പിച്ചെന്ന സംശയത്തില്‍ ദേഹപരിശോധനയ്ക്കായി ആശുപത്രിയിലെത്തിച്ച യാത്രക്കാരന്‍ കസ്റ്റംസ് ഉദ്യോഗസ്ഥനെ തള്ളിയിട്ട് രക്ഷപ്പെട്ടു. നിലമ്പൂര്‍ നമ്പൂരിപ്പൊട്ടി സ്വദേശി മൂസന്‍ (20) ആണ് രക്ഷപ്പെട്ടത്. വ്യാഴാഴ്ച വൈകിട്ട് ദുബൈയില്‍ നിന്നുള്ള എയര്‍ഇന്ത്യ എക്‌സ്പ്രസ് വിമാനത്തിലാണ് മൂസന്‍ കരിപ്പൂരിലെത്തിയത്.
ദുബൈയില്‍ നിന്നെത്തിയ മൂസനെ സ്വര്‍ണമുണ്ടെന്ന സംശയത്തെ തുടര്‍ന്ന് കസ്റ്റംസ് പരിശോധനയ്ക്കായി മാറ്റിനിര്‍ത്തി. ശേഷം ശാരീരിക ബുദ്ധിമുട്ട് അനുഭവപ്പെട്ടതിനെ തുടര്‍ന്ന് കൊണ്ടോട്ടി സ്വകാര്യ ആശുപത്രിയിലേക്ക് കൊണ്ടുപോയി. ആശുപത്രിയിലെത്തിയ ഉടന്‍ സമീപത്തുണ്ടായിരുന്ന ഉദ്യോഗസ്ഥനെ തള്ളിമാറ്റി മഞ്ചേരി ഭാഗത്തേക്ക് പോവുകയായിരുന്ന ലോറിയില്‍ കയറി ഇയാള്‍ രക്ഷപ്പെടുകയായിരുന്നു.
ഔദ്യോഗിക കൃത്യനിര്‍വഹണം തടസപ്പെടുത്തിയെന്ന കസ്റ്റംസ് പരാതിയില്‍ ഇയാള്‍ക്കെതിരേ കൊണ്ടോട്ടി പൊലിസ് കേസെടുത്തു. തുടര്‍ന്നുള്ള അന്വേഷണത്തില്‍ ഇയാള്‍ രക്ഷപ്പെട്ട ലോറി കസ്റ്റഡിയിലെടുത്തു. കൊണ്ടോട്ടിയില്‍നിന്ന് കയറിയ യുവാവ് സമീപത്തെ കൊട്ടൂക്കരയില്‍ ഇറങ്ങിയെന്നാണ് ലോറി ഡ്രൈവര്‍ പൊലിസിനു മൊഴിനല്‍കിയത്. ഇയാളുടെ വീട്ടില്‍ പരിശോധന നടത്തിയെങ്കിലും കണ്ടെത്താനായില്ല.