നീലേശ്വരം: കായിക പ്രേമികളുടെ ചിരകാല സ്വപ്നമായ നീലേശ്വരം ഇ.എം.എസ് സ്റ്റേഡിയത്തിന്റെ നിര്‍മാണത്തിനു മുന്നോടിയായി അധികൃതര്‍ സ്ഥലം സന്ദര്‍ശിച്ചു.
പുത്തരിയടുക്കം ബ്ലോക്ക് ഓഫിസിനു മുന്‍പിലെ സ്ഥലമാണു സ്‌പോര്‍ട്‌സ് യുവജനകാര്യ ഡയറക്ടര്‍ സജയ്കുമാര്‍, നാഷണല്‍ ഗെയിംസ് എക്‌സിക്യൂട്ടീവ് എന്‍ജിനീയര്‍ ആര്‍.ബിജു എന്നിവരടങ്ങുന്ന സംഘം സന്ദര്‍ശിച്ചത്.  
നഗരസഭാ അധ്യക്ഷന്‍ പ്രൊഫ.കെ.പി ജയരാജന്‍, ഉപാധ്യക്ഷ വി.ഗൗരി, സ്ഥിരംസമിതി അധ്യക്ഷരായ എ.കെ കുഞ്ഞികൃഷ്ണന്‍, ടി.കുഞ്ഞിക്കണ്ണന്‍, പി.പി മുഹമ്മദ്‌റാഫി, പി.എം സന്ധ്യ, കൗണ്‍സിലര്‍മാര്‍, സെക്രട്ടറി എന്‍.കെ ഹരീഷ്, സ്‌പോര്‍ട്‌സ് കൗണ്‍സില്‍ മുന്‍ പ്രസിഡന്റ് എം.അച്യുതന്‍ എന്നിവര്‍ കൂടെയുണ്ടായിരുന്നു.
       400 മീറ്റര്‍ സിന്തറ്റിക് ട്രാക്ക് സ്റ്റേഡിയത്തിനാണു ബജറ്റില്‍ തുക വകയിരുത്തിയത്.
ഇത്രയും വിസ്താരമുള്ള ട്രാക്കിനു അനുയോജ്യമായ സ്ഥലമാണെന്നു ആദ്യ പരിശോധനയില്‍ തന്നെ സംഘത്തിനു ബോധ്യപ്പെട്ടു. ഫുട്‌ബോള്‍, വോളിബോള്‍, ബാസ്‌കറ്റ് ബോള്‍ കോര്‍ട്ടുകളും സ്റ്റേഡിയത്തിലൊരുക്കും. ഇതിന്റെ വിശദാംശങ്ങള്‍ സംഘം നഗരസഭാ പ്രതിനിധികളുമായി ചര്‍ച്ച ചെയ്തു.