മഞ്ചേരി: മഞ്ചേരി മെഡിക്കല്‍ കോളജ് എം.ബി.ബി.എസ് വിദ്യാര്‍ഥികളുടെ നിരാഹാര സമരം രണ്ടു ദിവസം പിന്നിട്ടു. സര്‍ജറി ഉള്‍പ്പെടെ എല്ലാ വിഭാഗങ്ങളിലും കുറവുകള്‍ നികത്തി സൗകര്യങ്ങള്‍ വര്‍ധിപ്പിക്കുന്നതു സംബന്ധിച്ച് ആരോഗ്യവകുപ്പ് മന്ത്രി അല്ലങ്കില്‍ ഡി.എം.ഇ മുഖാന്തിരം ഉറപ്പുനല്‍കാതെ സമരം അവസാനിപ്പിക്കില്ലെന്ന നിലപാടിലാണ് വിദ്യാര്‍ഥികള്‍.
മൂന്നു പെണ്‍കുട്ടികള്‍ ഉള്‍പ്പെടെ അഞ്ചു പേരാണ് ചൊവ്വാഴ്ച നിരാഹാര സമരം തുടങ്ങിയിരുന്നത്. എന്നാല്‍, അവസാന വര്‍ഷ വിദ്യാര്‍ഥികളായ വിനായക്, ആരിഫ, അഹ്‌സന എന്നിവര്‍കൂടി നിരാഹാരം സമരവുമായി മുന്നോട്ടുവന്നതോടെ സമരമുഖത്ത് എട്ടു പേരായി. ഇവര്‍ക്കു പിന്തുണയുമായി മറ്റു വിദ്യാര്‍ഥികളും സമരപ്പന്തലിലുണ്ട്. സമരം രണ്ടാംദിനം കടന്നതോടെ ക്ലാസുകളും നടക്കാതായി. ആദ്യവര്‍ഷ വിദ്യാര്‍ഥികള്‍ക്കുമാത്രമാണ് നിലവില്‍ ക്ലാസുകള്‍ നടക്കുന്നത്. ഇന്നലെ പ്രിന്‍സിപ്പല്‍ ഇന്‍ ചാര്‍ജ് ഡോ. സിറിയക് ജോബുമായി വിദ്യാര്‍ഥികള്‍ ചര്‍ച്ച നടത്തി. മൂന്നു ഡോക്ടര്‍മാരെ നിയമിക്കാനുള്ള നടപടികള്‍ സ്വീകരിക്കാമെന്നു പറഞ്ഞെങ്കിലും വിദ്യാര്‍ഥികള്‍ വഴങ്ങിയില്ല. അതേസമയം, അധികൃതര്‍ മൗനം തുടരുന്നതില്‍ വിദ്യാര്‍ഥികള്‍ പ്രതിഷേധം രേഖപ്പെടുത്തി. പ്രതീകാത്മകമായി മെഡിക്കല്‍ കോളജിന്റെ ശവപ്പെട്ടിയുണ്ടാക്കി അതിനുമുന്നില്‍ റീത്ത് സമര്‍പ്പിച്ചായിരുന്നു പ്രതിഷേധം.