റിയാദ്: ആണവ-ബാലിസ്റ്റിക് മിസൈല്‍ പദ്ധതികള്‍ വികസിപ്പിക്കാനുള്ള ഇറാന്റെ ശ്രമങ്ങള്‍ക്കെതിരേ ഉറച്ച നിലപാട് സ്വീകരിക്കാന്‍ ലോകരാജ്യങ്ങളോട് ആഹ്വാനം ചെയ്ത് സഊദി രാജാവ് സല്‍മാന്‍ ബിന്‍ അബ്ദുല്‍ അസീസ്. രാജ്യത്തെ ഉന്നത സര്‍ക്കാര്‍ ഉപദേശകസമിതിയെ അഭിസംബോധന ചെയ്യുകയായിരുന്നു അദ്ദേഹം.
ഇറാന്റെ മറ്റു രാജ്യങ്ങളിലെ ഇടപെടല്‍, ഭീകരതയെ വളര്‍ത്തല്‍, വിഭാഗീയതയെ ചൂഷണം ചെയ്യല്‍ തുടങ്ങിയവയിലെ അപകടങ്ങള്‍ ചൂണ്ടിക്കാട്ടിയ സഊദി രാജാവ് വന്‍ പ്രഹരശേഷിയുള്ള ആയുധങ്ങള്‍ നേടുന്നതില്‍നിന്നും ബാലിസ്റ്റിക് മിസൈല്‍ പദ്ധതി വികസിപ്പിക്കുന്നതില്‍നിന്നും ഇറാനെ തടയാന്‍ അന്താരാഷ്ട്ര സമൂഹം നടപടിയെടുക്കണമെന്ന് ആവശ്യപ്പെട്ടു.
സെപ്റ്റംബറില്‍ യു.എന്‍ പൊതുസഭയെ വിഡിയോ ലിങ്ക് വഴി അഭിസംബോധന ചെയ്തതിനു ശേഷം 84കാരനായ സല്‍മാന്‍ രാജാവ് ഇറാനെതിരായ പരസ്യ പരാമര്‍ശം നടത്തുന്നത് ഇതാദ്യമായാണ്. ഇറാന്റെ വിപുലീകരണവാദത്തെയും അദ്ദേഹം അപലപിച്ചു. യമനില്‍ സഊദി സഖ്യത്തിന്റെ എതിര്‍ ഭാഗത്തുള്ള ഹൂത്തി വിമതരെ ആയുധം നല്‍കി സഹായിക്കുന്നത് ഇറാനാണ്.