ലോര്‍ഡ്‌സ്: ലോര്‍ഡ്‌സിലെ പുല്‍മൈതാനത്ത് ഇന്ന് ദക്ഷിണാഫ്രിക്കയും പാകിസ്താനും ഇറങ്ങുന്നത് തോല്‍വിഭാരം കുറച്ച് മാനം കാക്കാനാണ്. ഈ ലോകകപ്പില്‍ ഇരുവരുടേയും സെമിഫൈനല്‍ സാധ്യതകള്‍ക്ക് ഏറെക്കുറേ മങ്ങലേറ്റു കഴിഞ്ഞു. അവശേഷിക്കുന്ന മത്സരങ്ങള്‍ ജയിച്ച് മാന്യമായി ലോകകപ്പിനോട് വിട പറയാനായിരിക്കും ഇരുവരുടേയും തയാറെടുപ്പ്. ഏറെ കൊട്ടിയാഘോഷിച്ച് ഈ ലോകകപ്പിനെത്തിയ ഇരുവരുടെയും തുടക്കം തന്നെ പാളി. തോറ്റു തുടങ്ങിയ ഇരു ടീമുകള്‍ക്കും പിന്നീട് തിരിച്ചുവരാനായില്ല.

ഇന്ത്യയോടേറ്റ തോല്‍വി തെല്ലൊന്നുമല്ല പാകിസ്താന് തിരിച്ചടിയായത്. ടോസ് നേടി ബൗളിങ് തിരഞ്ഞെടുത്ത പാക് ക്യാപ്റ്റനെതിരേയും നിര്‍ണായക മത്സരത്തില്‍ കളിമറന്ന മറ്റു താരങ്ങള്‍ക്കെതിരേയും മുന്‍ ക്രിക്കറ്റ് താരങ്ങളും പാക് ആരാധകരും രംഗത്തുവന്നു. ഇതിനിടെ പാക് പേസര്‍ ഹസന്‍ അലിയുടെ ഒരു ട്വീറ്റ് പാക് ടീമിനെയാകെ പ്രതിരോധത്തിലാഴ്ത്തിയിരിക്കുകയാണ്. ഇന്ത്യ-പാക് മത്സര ശേഷം ഇന്ത്യയെ അഭിനന്ദിച്ചുകൊണ്ട് രംഗത്തെത്തിയ മാധ്യമ പ്രവര്‍ത്തക മുംതാസ് ഖാന്റെ ട്വീറ്റിനു താഴെ മറുപടി നല്‍കിയതാണ് ഹസന്‍ അലിക്കു പറ്റിയ അമളി.
ഇന്ത്യ കിരീടം എത്തിപ്പിടിക്കട്ടെ എന്നാശംസിച്ച ട്വീറ്റിനു താഴെ നിങ്ങളുടെ പ്രാര്‍ഥന സഫലമാകട്ടെ എന്നായിരുന്നു ഹസന്‍ അലിയുടെ മറുപടി. ഇതിനെതിരേ വ്യാപക പ്രതിഷേധമാണുയര്‍ന്നത്. കമന്റ് ഹസന്‍ അലി നീക്കം ചെയ്‌തെങ്കിലും ലോകകപ്പില്‍ മികച്ച പ്രകടനം പുറത്തെടുക്കാതെ താരങ്ങള്‍ നാട്ടിലേക്കു മടങ്ങേണ്ട എന്ന നിലപാടിലാണ് ആരാധകര്‍.

അതിനാല്‍ ഇനിയുള്ള മത്സരങ്ങള്‍ ജയിച്ച് ഒരു തിരിച്ചുവരവിനായിരിക്കും പാക് ടീമിന്റെ ശ്രമം. നിലവില്‍ അഞ്ചു മത്സരങ്ങളില്‍ നിന്നായി മൂന്നു പോയിന്റുമായി പോയിന്റ് ടേബിളില്‍ ഒന്‍പതാമതാണ് പാകിസ്താന്‍.