പത്തനംതിട്ട: ആറന്മുളയില്‍ വിമാനത്താവളത്തിനായി ഏറ്റെടുത്ത ഭൂമി, ഭൂപരിഷ്‌കരണ നിയമത്തിന്റെ ലാന്‍ഡ് സീലിങ് ആക്ട് ലംഘിച്ചതായി ഹൈക്കോടതി കണ്ടെത്തിയ പശ്ചാത്തലത്തില്‍ മിച്ചഭൂമി സര്‍ക്കാര്‍ ഏറ്റെടുക്കുമെന്ന് കൃഷിമന്ത്രി വി.എസ്. സുനില്‍കുമാര്‍. ഇതിനുള്ള നടപടി ഈ സര്‍ക്കാരിന്റെ കാലത്തുതന്നെ ഉണ്ടാകും. ഹൈക്കോടതി വിധി പ്രകാരം ലാന്‍ഡ് അസൈന്‍മെന്റ് കമ്മിറ്റി യോഗം ചേര്‍ന്ന് നടപടിക്രമങ്ങള്‍ പൂര്‍ത്തീകരിച്ചതായും മന്ത്രി പറഞ്ഞു. ആറന്മുള അരിയുടെ വിപണനവും അരിക്കടയുടെ ഉദ്ഘാടനവും നെല്ലിന്റെ സംഭരണവില വിതരണവും ഐക്കര ജങ്ഷനില്‍ നിര്‍വഹിച്ച് സംസാരിക്കുകയായിരുന്നു അദ്ദേഹം.
വിമാനത്താവളത്തിനായി ഏറ്റെടുത്ത 420 ഹെക്ടര്‍ ഉള്‍പ്പെടെ ആറന്മുള പുഞ്ചയിലെ എല്ലാ പ്രദേശത്തും രണ്ടു വര്‍ഷത്തിനുള്ളില്‍ പൂര്‍ണമായ തോതില്‍ നെല്‍കൃഷി പുനരാരംഭിക്കും. നെല്‍കൃഷി വ്യാപനത്തിനായി സംസ്ഥാന സര്‍ക്കാര്‍ സ്വീകരിച്ച നടപടികളെപ്പറ്റി കൃഷിവകുപ്പ് വിശദമായ റിപ്പോര്‍ട്ട് പ്രസിദ്ധീകരിക്കും. നെല്ല് കുത്തുന്നതിന് മൂന്ന് ചെറുകിട മില്ലുകള്‍ ആരംഭിക്കുകയും അരി പ്രാദേശിക ബ്രാന്‍ഡ് നാമത്തില്‍ ലഭ്യമാക്കുകയും ചെയ്യുന്നതിന് സര്‍ക്കാര്‍ പദ്ധതി നടപ്പാക്കുമെന്നും മന്ത്രി പറഞ്ഞു. ചടങ്ങില്‍ വീണാ ജോര്‍ജ് എം.എല്‍.എ അധ്യക്ഷനായി. സഹകരണ നിക്ഷേപ ഗ്യാരണ്ടി ബോര്‍ഡ് വൈസ് ചെയര്‍മാന്‍ എ. പത്മകുമാര്‍, സി.പി.എം ജില്ലാ സെക്രട്ടറി കെ.പി. ഉദയഭാനു, സി.പി.ഐ ജില്ലാ സെക്രട്ടറി എ.പി. ജയന്‍, ഓയില്‍പാം ചെയര്‍മാന്‍ വിജയന്‍ കുനിശേരി, പ്രിന്‍സിപ്പല്‍ കൃഷി ഓഫിസര്‍ ഷൈല ജോസഫ് തുടങ്ങിയവര്‍ പങ്കെടുത്തു.