ബുലന്ദ്ഷഹര്‍: ഉത്തര്‍പ്രദേശില്‍ സ്ത്രീകള്‍ക്കെതിരേ നിലയ്ക്കാത്ത കൊടുക്രൂരതകള്‍ വീണ്ടും. ജഹാംഗിറാബാദില്‍ ലൈംഗിക ആക്രമണത്തിനിരയായ കൗമാരക്കാരിയെ പ്രതിയുടെ കുടുംബം ചുട്ടുകൊന്നു. പീഡനം സംബന്ധിച്ച് പെണ്‍കുട്ടി പുറത്തുപറയാതിരിക്കാനാണ് പ്രതിയുടെ ബന്ധുവും അമ്മാവനും ചേര്‍ന്ന് മണ്ണെണ്ണയൊഴിച്ച് തീകൊളുത്തിയത്. ഗുരുതരമായി പൊള്ളലേറ്റ പെണ്‍കുട്ടിയെ വിദഗ്ധ ചികില്‍സയ്ക്കായി ഡല്‍ഹിയിലെ സഫ്ദര്‍ജംഗ് ആശുപത്രിയില്‍ പ്രവേശിപ്പിച്ചെങ്കിലും ഇന്നലെ മരിച്ചു.
സംഭവത്തെത്തുടര്‍ന്ന് പെണ്‍കുട്ടിയുടെ കുടുംബം സഞ്ജയ്, ഭാര്യ കാജല്‍, ബന്ധുക്കളായ അഞ്ചുപേര്‍ എന്നിവര്‍ക്കെതിരേ പരാതി നല്‍കി. എന്നാല്‍ പെണ്‍കുട്ടി സ്വയം തീകൊളുത്തിയതാണെന്ന വാദത്തിലായിരുന്നു പൊലിസ്. പെണ്‍കുട്ടിയുടെ കുടുംബത്തിന്റെ ശക്തമായ ഇടപെടലിനൊടുവില്‍ കൊലപാതകം ഉള്‍പ്പെടെയുള്ള വകുപ്പുകള്‍ പ്രകാരം കേസെടുത്തു. സംഭവത്തില്‍ തുടക്കത്തില്‍ അനാസ്ഥ കാണിച്ച എസ്.ഐ വിനയ്കാന്ത് ഗൗതമിനെ സസ്‌പെന്റ് ചെയ്തതായി ജില്ലാ പൊലിസ് മേധാവി എസ്.കെ സിങ് അറിയിച്ചു.