താമരശേരി: കോടഞ്ചേരിയിലേത് വിഷമദ്യ ദുരന്തമല്ലെന്ന് പോസ്റ്റ്‌മോര്‍ട്ടം റിപ്പോര്‍ട്ട്. മദ്യത്തോടൊപ്പം കീടനാശിനിയുടെ അവശിഷ്ടവും മരിച്ച കോടഞ്ചേരി ചെമ്പിലി ആദിവാസി കോളനിയിലെ കൊളുമ്പന്റെ ശരീരത്തില്‍ കണ്ടെത്തിയതായി പ്രാഥമിക പോസ്റ്റ്‌മോര്‍ട്ടം റിപ്പോര്‍ട്ടില്‍ വ്യക്തമാക്കുന്നു.
ഇവര്‍ക്ക് എങ്ങനെ കീടനാശിനി അടങ്ങിയ മദ്യം ലഭിച്ചുവെന്നതാണ് ഇനി വ്യക്തമാകേണ്ടത്. കൊളുമ്പനോടൊപ്പം മദ്യപിച്ച രണ്ടുപേരും സുഖംപ്രാപിച്ചാല്‍ മാത്രമേ വിശദമായ തെളിവെടുപ്പിന് സാധ്യമാവുകയുള്ളൂ. ഇവര്‍ മദ്യപിച്ചെന്ന് കരുതുന്ന സ്ഥലങ്ങളില്‍ പൊലിസും എക്‌സൈസും പരിശോധന നടത്തിയെങ്കിലും കാര്യമായ തെളിവുകള്‍ ലഭിച്ചിട്ടില്ല.
ഇവര്‍ വിഷമദ്യമല്ല കഴിച്ചതെന്നാണ് പ്രാഥമികമായി വ്യക്തമാകുന്നതെന്ന് എക്‌സൈസ് ജോയിന്റ് കമ്മിഷണര്‍ വി.ജെ മാത്യു വ്യക്തമാക്കിയിരുന്നു. ഏതെങ്കിലും തരത്തിലുള്ള വിഷാംശം ഇവരുടെ ശരീരത്തിനുള്ളില്‍ എത്തിയതാണെന്ന സംശയത്തിലാണ് എക്‌സ്‌സൈസ് വകുപ്പ് ഇപ്പോഴുള്ളത്.
വിഷമദ്യമാണ് ശരീരത്തിലെത്തിയതെങ്കില്‍ കാഴ്ചശക്തി നഷ്ടപ്പെടും. കൂടാതെ രൂക്ഷമായ ഗന്ധവും അനുഭവപ്പെടും. എന്നാല്‍, ഇത്തരത്തിലുള്ള യാതൊരു ലക്ഷണവും തൊഴിലാളികളില്‍ കണ്ടിട്ടില്ല. ഇന്നലെ കോഴിക്കോട് മെഡിക്കല്‍ കോളജില്‍ നടത്തിയ പോസ്റ്റ്‌മോര്‍ട്ടത്തില്‍ ആമാശയത്തില്‍ ആല്‍ക്കഹോളിന്റെയും കീടനാശിനിയായ ഫ്യൂരിഡാന്റെയും അംശം കണ്ടെത്തി.
വെള്ളിയാഴ്ച രാത്രിയോടെയാണ് പാലക്കല്‍ കൊയപ്പത്തൊടി എസ്റ്റേറ്റിലെ തൊഴിലാളികളായ മൂന്നുപേര്‍ പല സ്ഥലങ്ങളിലായി കുഴഞ്ഞുവീണത്. ഇതില്‍ ചെമ്പിലി ആദിവാസി കോളനിയിലെ കൊളമ്പന്‍ മെഡിക്കല്‍ കോളജില്‍ വച്ച് മരിച്ചു. കൂടെയുണ്ടായിരുന്ന ഗോപാലനും നാരായണനും അവശനിലയില്‍ മെഡിക്കല്‍ കോളജ് ആശുപത്രിയില്‍ തീവ്രപരിചരണ വിഭാഗത്തില്‍ ചികിത്സയിലാണ്.