മലപ്പുറം: ഓണ്‍ലൈന്‍ തട്ടിപ്പ് കേസില്‍ മഞ്ചേരിയില്‍ പൊലിസ് പിടിയിലായിരുന്ന കാമറൂണ്‍ സ്വദേശികള്‍ക്ക് പണം കൈമാറാറുള്ള ഏജന്റുമാരായ രണ്ടു രാജസ്ഥാന്‍ സ്വദേശികള്‍ പൊലിസ് പിടിയില്‍. രാജസ്ഥാനിലെ ചിറ്റോര്‍ഗഡ് കുംഭനഗര്‍ സ്വദേശി മുകേഷ് ചിപ്പ (48), ഉദയ്പൂര്‍ സ്വദേശി സന്ദീപ് മൊഹീന്ദ്ര (41) എന്നിവരെയാണ് മഞ്ചേരി പൊലിസ് രാജസ്ഥാനില്‍നിന്ന് അറസ്റ്റ് ചെയ്തത്.
അനധികൃതമായി വരുന്ന പണം കമ്മിഷന്‍ വ്യവസ്ഥയില്‍ ഇടപാടുകാര്‍ക്ക് എത്തിക്കുന്ന സംഘമാണ് അറസ്റ്റിലായത്. കാമറൂണ്‍ നോര്‍ത്ത് വെസ്റ്റ് റീജിയന്‍ സ്വദേശികളായ അകുംബെ ബോമ ഞ്ചിവ, ലാങ്ജി കിലിയന്‍ കെങ് എന്നിവരെ കഴിഞ്ഞ മാസം ഹൈദരാബാദില്‍നിന്ന് അറസ്റ്റ് ചെയ്തിരുന്നു.
ഇപ്പോള്‍ പിടിയിലായ മുകേഷ് ചിപ്പയെ തേടി രണ്ട് മാസം മുന്‍പ് പൊലിസ് രാജസ്ഥാനില്‍ എത്തിയിരുന്നെങ്കിലും കണ്ടെത്താനായിരുന്നില്ല. തുടര്‍ന്നു മൊബൈല്‍ നമ്പര്‍ കേന്ദ്രീകരിച്ചും മറ്റും നടത്തിയ അന്വേഷണത്തിന്റെ അടിസ്ഥാനത്തിലാണ് പൊലിസ് വീണ്ടും രാജസ്ഥാനിലെത്തിയത്. ചിറ്റോര്‍ഗഡ് ജില്ലാ കോടതി പരിസരത്തുവച്ചാണ് ഇയാളെ അറസ്റ്റ് ചെയ്തത്.
ചോദ്യം ചെയ്തതില്‍നിന്നു ലഭിച്ച വിവരപ്രകാരം സമീപപ്രദേശമായ ചിറ്റോര്‍ഗഡ് ചന്ദേരിയയില്‍നിന്നു സന്ദീപ് മൊഹീന്ദ്രയെയും അറസ്റ്റ് ചെയ്തു. പ്രതികളില്‍നിന്നു നിരവധി മൊബൈല്‍ ഫോണുകള്‍, സിം കാര്‍ഡുകള്‍, എ.ടി.എം കാര്‍ഡുകള്‍, മറ്റ് രേഖകള്‍ തുടങ്ങിയവ പിടിച്ചെടുത്തിട്ടുണ്ട്. മഞ്ചേരി ആസ്ഥാനമായുള്ള ഹോള്‍സെയില്‍ മരുന്ന് വിപണന കേന്ദ്രത്തിലേക്ക് ആവശ്യമായ വിലപിടിപ്പുള്ള മരുന്ന് വെബ്‌സൈറ്റില്‍ സെര്‍ച്ച് ചെയ്തതിനെ തുടര്‍ന്ന് ബന്ധപ്പെട്ട പ്രതികള്‍ ഇപ്രകാരം പരാതിക്കാരനില്‍നിന്ന് ഒന്നേകാല്‍ ലക്ഷത്തോളം രൂപ തട്ടിയെടുത്തിരുന്നു. കോടിക്കണക്കിന് രൂപയുടെ സാമ്പത്തിക തട്ടിപ്പുകള്‍ ഇവര്‍ മുഖേന നടത്തിയതായി വിവരം ലഭിച്ചിട്ടുണ്ട്. പ്രതികളെ ഇന്ന് മഞ്ചേരി സി.ജെ.എം കോടതിയില്‍ ഹാജരാക്കും.