തിരുവനന്തപുരം: ഔദ്യോഗിക യാത്രകളില്‍ ഭാര്യയുടെ ചെലവുകൂടി സര്‍ക്കാര്‍ വഹിക്കണമെന്ന പി.എസ്.സി ചെയര്‍മാന്‍ എം.കെ സക്കീറിന്റെ ആവശ്യം മുഖ്യമന്ത്രി തള്ളി. മന്ത്രിമാര്‍ക്കും മറ്റു ഭരണഘടനാ സ്ഥാപനങ്ങളിലെ ചെയര്‍മാന്‍മാര്‍ക്കും ഇല്ലാത്ത അവകാശം പി.എസ്.സി ചെയര്‍മാന് മാത്രം അനുവദിക്കാനാകില്ലെന്ന് മുഖ്യമന്ത്രി ഫയലില്‍ കുറിച്ചു.
അതേസമയം, ചെയര്‍മാന്റെ ഭാര്യക്കുകൂടി ക്ഷണമുള്ള സമ്മേളനങ്ങളില്‍ ചെലവ് പരിഗണിക്കാമെന്നും ഫയലില്‍ കുറിച്ചിട്ടുണ്ട്. നേരത്തേ പി.എസ്.സി ചെയര്‍മാന്റെ ആവശ്യം പൊതുഭരണ വകുപ്പ് സെക്രട്ടറിയും ധനവകുപ്പ് സെക്രട്ടറിയും തള്ളിയിരുന്നു. ഭരണഘടനാ സ്ഥാപന മേധാവിയെന്ന നിലയില്‍ അന്തിമ തീരുമാനത്തിനായി മുഖ്യമന്ത്രിക്ക് ഫയല്‍ നല്‍കുകയായിരുന്നു.
ഫയല്‍ ഇന്നലെ മുഖ്യമന്ത്രിയുടെ ഓഫിസില്‍ നിന്ന് പൊതുഭരണവകുപ്പിന് കൈമാറി. ഇക്കാര്യം പൊതുഭരണ വകുപ്പ് ഇന്ന് പി.എസ്.സി സെക്രട്ടറിയെ രേഖാമൂലം അറിയിക്കും. ഇതര സംസ്ഥാനങ്ങളിലെല്ലാം ചെയര്‍മാനൊപ്പം പോകുന്ന ഭാര്യയുടെ ചെലവ് സര്‍ക്കാരാണ് വഹിക്കുന്നതെന്നും സംസ്ഥാനം ഇക്കാര്യം മാതൃകയാക്കണമെന്നുമായിരുന്നു പി.എസ്.സി ചെയര്‍മാന്റെ ആവശ്യം.
നിലവില്‍ ഹൈക്കോടതി ജഡ്ജിമാര്‍, ചീഫ് ജസ്റ്റിസ്, ഗവര്‍ണര്‍, മുഖ്യമന്ത്രി എന്നിവരുടെ ഭാര്യമാരുടെ യാത്രാച്ചെലവ് വഹിക്കുന്നത് സംബന്ധിച്ച് മാത്രമാണ് സര്‍ക്കാര്‍ ഉത്തരവുള്ളത്. ആദ്യമായാണ് പി.എസ്.സിയില്‍ നിന്ന് ഇത്തരമൊരാവശ്യം സംസ്ഥാന സര്‍ക്കാരിന് മുന്നിലെത്തിയത്.