അമ്പലപ്പുഴ: ദേശീയപാതയില്‍ പുന്നപ്രയില്‍ കണ്ടെയ്‌നര്‍ ലോറി റോഡിന് കുറുകെ കിടന്നു നാലരമണിക്കൂറോളം ദേശീയപാതയില്‍ ഗതാഗതം സ്തംഭിച്ചു.
ഇന്നലെ  പുലര്‍ച്ചെ 6.30 ഓടെ ദേശീയപാതയില്‍ പുന്നപ്ര കപ്പക്കടക്ക് സമീപമായിരുന്നു കണ്ടെയ്‌നര്‍ ലോറി റോഡിനു കുറുകെ തകരാറിലായി കിടന്നത്. കപ്പക്കടക്ക് സമീപമുളള ഷോറൂമില്‍ കാറുകള്‍ ഇറക്കാനായി വന്ന കണ്ടെയ്‌നര്‍ ഷോറൂമിലേക്ക് കയറ്റാനായി തിരിക്കുന്നതിനിടെ തകരാറിലാവുകയായിരുന്നു.
പിന്നീട് ആലപ്പുഴയില്‍ നിന്നെത്തിയ ഫയര്‍ഫോഴ്‌സും പുന്നപ്ര പോലീസും നാട്ടുകാരും ചേര്‍ന്ന് ലോറി നീക്കം ചെയ്തു.
ഇതിനെതുടര്‍ന്ന് ദേശീയപാതയില്‍ ഗതാഗതം പുനസ്ഥാപിച്ചത്. ദേശീയപാതയില്‍ ഗതാഗതം സ്തംഭിച്ചതോടെ തീരദേശ റോഡ് പഴയനടക്കാവ് റോഡ് എന്നിവിടങ്ങളിലൂടെ ഗതാഗതം തിരിച്ചുവിട്ടെങ്കിലും പിന്നീട് ഈ റോഡുകളിലും വലിയ ഗതാഗത കുരുക്കാണ് അനുഭവപ്പെട്ടത്. സ്വകാര്യ ബസുകള്‍ രാവിലെ 10 വരെ സര്‍വീസ് നിര്‍ത്തിവെച്ചു. ചില സ്‌കൂളുകള്‍ക്ക് ഇന്നലെ ഗതാഗത തടസത്തെതുടര്‍ന്ന് അവധിയും നല്‍കിയിരുന്നു.