തൊടുപുഴ: നെടുങ്കണ്ടം കസ്റ്റഡി മരണവുമായി ബന്ധപ്പെട്ട് റിമാന്‍ഡിലുള്ള എസ്.ഐയുടെയും സി.പി.ഒയുടെയും ജാമ്യാപേക്ഷ പീരുമേട് കോടതി തള്ളി. കേസില്‍ ഉള്‍പ്പെട്ട കൂടുതല്‍ പൊലിസുകാരുടെ അറസ്റ്റ് ഉടനുണ്ടായേക്കും.

ഒന്നും നാലും പ്രതികളായ നെടുങ്കണ്ടം മുന്‍ എസ്.ഐ സാബു, സി.പി.ഒ സജീവ് ആന്റണി എന്നിവരാണ് ഇപ്പോള്‍ ദേവികുളം സബ് ജയിലില്‍ റിമാന്‍ഡിലുള്ളത്. രണ്ടും മൂന്നും പ്രതികളുടെ അറസ്റ്റ് ഉടനുണ്ടാകുമെന്ന സൂചനകളാണ് ക്രൈംബ്രാഞ്ച് പ്രത്യേക അന്വേഷണസംഘം നല്‍കുന്നത്. ഇവരില്‍ നിന്ന് മൊഴിയെടുക്കല്‍ തുടരുകയാണ്. ഈ രണ്ട് പ്രതികളാണ് രാജ്കുമാറിനെ കൂടുതല്‍ മര്‍ദിച്ചത്. ഇത് സാധൂകരിക്കുന്ന മൊഴികളും തെളിവുകളും ശേഖരിക്കുന്ന തിരക്കിലാണ് അന്വേഷണസംഘം.

റിമാന്‍ഡിലുള്ള പ്രതികളെ കസ്റ്റഡിയില്‍ വാങ്ങാനുള്ള നടപടികള്‍ ക്രൈംബ്രാഞ്ച് തുടങ്ങിയിട്ടുണ്ട്. സാമ്പത്തിക തട്ടിപ്പ് കേസിലെ അന്വേഷണവും പുരോഗമിക്കുകയാണ്. കേസിലെ മൂന്നാം പ്രതിയായ മഞ്ജുവും ഭര്‍ത്താവ് അജിയും പറഞ്ഞ ചില പേരുകള്‍ കേന്ദ്രീകരിച്ചാണ് പുതിയ അന്വേഷണം. അതിനിടെ, ഇടുക്കി ജില്ലാ പൊലിസ് മേധാവി കെ.ബി വേണുഗോപാലിനെ സസ്‌പെന്‍ഡ് ചെയ്യണമെന്ന് ആവശ്യപ്പെട്ട് സി.പി.ഐ രംഗത്തെത്തിയിട്ടുണ്ട്. നടപടി ആവശ്യപ്പെട്ട് ഇന്നലെ കോണ്‍ഗ്രസ് നേതൃത്വത്തില്‍ എസ്.പി ഓഫിസ് മാര്‍ച്ച് സംഘടിപ്പിച്ചിരുന്നു.

സംസ്ഥാനത്ത് പൊലിസ് രാജ്: ചെന്നിത്തല

തിരുവനന്തപുരം: സംസ്ഥാനത്ത് പൊലിസ് രാജാണ് നടക്കുന്നതെന്ന് പ്രതിപക്ഷ നേതാവ് രമേശ് ചെന്നിത്തല.
ആന്തൂരിലെ പ്രവാസി സംരംഭകനായ സാജന്റെ ആത്മഹത്യക്ക് കാരണക്കാരിയായ നഗരസഭാ ചെയര്‍പേഴ്‌സണിനെതിരേ നടപടിയെടുക്കുക, നെടുങ്കണ്ടം ഉരുട്ടിക്കൊലക്കേസ് സി.ബി.ഐ അന്വേഷിക്കുക എന്നീ ആവശ്യങ്ങള്‍ ഉന്നയിച്ച് കോണ്‍ഗ്രസ് സെക്രട്ടേറിയറ്റിന് മുന്നില്‍ സംഘടിപ്പിച്ച ധര്‍ണ ഉദ്ഘാടനം ചെയ്യുകയായിരുന്നു അദ്ദേഹം. സംസ്ഥാനത്ത് കസ്റ്റഡിമരണങ്ങള്‍ തുടര്‍ക്കഥയാകുകയാണ്. പൊലിസുമായി ബന്ധപ്പെട്ട് 32 മരണങ്ങളും ഏഴ് കസ്റ്റഡി മരണങ്ങളും ഇതിനോടകം നടന്നു. പിണറായി ഭരിക്കുമ്പോള്‍ മനുഷ്യജീവന് പുല്ലുവിലയായി മാറി. ഇടതുപക്ഷത്തിന്റെ പൊലിസ് നയം കേരളത്തിന് ആപത്താണ്. പൊലിസ് വകുപ്പിനെതിരേ ഉയരുന്ന പരാതികള്‍ അന്വേഷിക്കാന്‍പോലും ആഭ്യന്തര വകുപ്പ് കൈകാര്യം ചെയ്യുന്ന മുഖ്യമന്ത്രി തയാറാകുന്നില്ല. നെടുങ്കണ്ടം ഉരുട്ടിക്കൊല സംഭവത്തില്‍ എസ്.പിയെ സംരക്ഷിക്കാനാണ് മുഖ്യമന്ത്രി ശ്രമിക്കുന്നത്. മന്ത്രി എം.എം മണിയും എസ്.പിയെ സംരക്ഷിക്കുന്ന നിലപാട് സ്വീകരിക്കുന്നു. എം.എം മണി ഇരിക്കാന്‍പറഞ്ഞാല്‍ കിടക്കുന്ന എസ്.പിയാണ് അത്. കുറ്റക്കാരായ പൊലിസുകാര്‍ക്കെതിരേ കൊലക്കുറ്റത്തിന് കേസെടുക്കാന്‍ ഇതുവരെ തയാറായിട്ടില്ലെന്നും അദ്ദേഹം പറഞ്ഞു.

സംസ്ഥാനത്ത് നടക്കുന്നത് ഭരണകൂട ഭീകരതയാണെന്ന് കെ.പി.സി.സി അധ്യക്ഷന്‍ മുല്ലപ്പള്ളി രാമചന്ദ്രനും പറഞ്ഞു.