മുക്കം: മണാശ്ശേരി കെ.എം.സി.ടി ആര്‍ക്കിടെക് കോളജില്‍ വിദ്യാര്‍ഥിയെ അകാരണമായി പുറത്താക്കിയതായി ആരോപിച്ച് എസ്.എഫ്.ഐ പ്രവര്‍ത്തകരും കുട്ടിയുടെ രക്ഷിതാവും പ്രിന്‍സിപ്പലിനെ ഉപരോധിച്ചു.
കോടഞ്ചേരി ചെമ്പ്കടവ് സ്വദേശിയും കോളജിലെ ആര്‍ക്കിടെക് ഒന്നാം വര്‍ഷ വിദ്യാര്‍ഥിയുമായ ടി.സി അനസിനെയാണ് കഴിഞ്ഞ ദിവസം കോളജില്‍ നിന്ന് പുറത്താക്കിയത്. ഇതില്‍ പ്രതിഷേധിച്ചാണ് ഇന്നലെ വൈകിട്ട് 3.30 മുതല്‍ പ്രിന്‍സിപ്പല്‍ സതീഷിനെ ഉപരോധിച്ചത്. എസ്.എഫ്.ഐ നേതാക്കളായ റഫീഖ് ചോണാട്, അരുണ്‍ ഒഴലോട്ട്, റിനില്‍ മണാശ്ശേരി തുടങ്ങിയവരുടെ നേതൃത്വത്തിലായിരുന്നു ഉപരോധം നടന്നത്. രാത്രി ഏഴ് മണിയോടെ നഗരസഭ കൗണ്‍സിലര്‍ എന്‍. ചന്ദ്രന്‍, മുക്കം എസ്.ഐ കെ.പി അഭിലാഷ് എന്നിവരുടെ നേതൃത്വത്തില്‍ നടന്ന ചര്‍ച്ചയില്‍ ഇന്ന് മാനേജ്‌മെന്റ് തീരുമാനം അറിയിക്കാമെന്ന ധാരണയോടെ സമരം അവസാനിപ്പിക്കുകയായിരുന്നു.
അതേസമയം വിദ്യാര്‍ഥിയെ പുറത്താക്കാനാണ് തീരുമാനമെങ്കില്‍ എസ്.എഫ്.ഐ സമരം ഏറ്റെടുക്കുമെന്ന് നേതാക്കള്‍ അറിയിച്ചു.