മലപ്പുറം: ഭരണപക്ഷ സര്‍വിസ് സംഘടനകളുടെ സജീവ പ്രവര്‍ത്തകരായ സര്‍ക്കാര്‍ ഉദ്യോഗസ്ഥര്‍ സാലറി ചലഞ്ചിന്റെയും നവകേരള ലോട്ടറിയുടെയും പ്രചാരണത്തിരക്കില്‍. ഇതു കാരണം ഇവര്‍ ഓഫിസിലിരുന്ന് സ്വന്തം ജോലികള്‍ നിര്‍വഹിക്കുന്നില്ലെന്ന പരാതി വ്യാപകമായി ഉയരുകയാണ്.
പ്രളയ ദുരിതാശ്വാസ പ്രവര്‍ത്തനങ്ങള്‍ക്കായി മുഖ്യമന്ത്രിയുടെ ദുരിതാശ്വാസ നിധിയിലേക്ക് ഒരു മാസത്തെ ശമ്പളം നല്‍കണമെന്ന നിര്‍ദേശം ജീവനക്കാര്‍ക്കിടയില്‍ സമ്മിശ്ര പ്രതികരണമാണ് സൃഷ്ടിച്ചത്. വലിയൊരു വിഭാഗം ഇത്രയും തുക നല്‍കാന്‍ വിസമ്മതിക്കുകയാണ്.
ഈ സാഹചര്യത്തിലാണ് സാലറി ചലഞ്ചില്‍ പങ്കുചേരാന്‍ ജീവനക്കാരെ പ്രേരിപ്പിക്കാനെന്ന പേരില്‍ ഭരണപക്ഷ സംഘടനയില്‍ പെട്ട ജീവനക്കാരില്‍ ചിലര്‍ രംഗത്തിറങ്ങിയിരിക്കുന്നത്. കൂട്ടത്തില്‍ ദുരിതാശ്വാസത്തിനു കൂടുതല്‍ തുക കണ്ടെത്താന്‍ സംസ്ഥാന സര്‍ക്കാര്‍ ആരംഭിച്ച പ്രത്യേക ഭാഗ്യക്കുറിയായ നവകേരളയുടെ പ്രചാരണവും ഇവര്‍ ഏറ്റെടുത്തിട്ടുണ്ട്. ഒക്ടോബര്‍ മൂന്നിനു നറുക്കെടുക്കുന്ന ഈ ലോട്ടറിയുടെ ടിക്കറ്റ് വില്‍പനയും ഇവര്‍ നടത്തുന്നതായി അറിയുന്നു.
രാവിലെ ഓഫിസില്‍ ഹാജര്‍ രേഖപ്പെടുത്തിയ ശേഷം പുറത്തിറങ്ങി ഇവര്‍ സാലറി ചലഞ്ചിന്റെയും ലോട്ടറിയുടെയും പ്രചാരണത്തിനായി സംഘം ചേര്‍ന്ന് പോകുകയാണ് ചെയ്യുന്നതെന്നു മറ്റു ജീവനക്കാര്‍ പറയുന്നു.
വിവിധ സര്‍ക്കാര്‍ ഓഫിസുകള്‍ സന്ദര്‍ശിച്ച് ഇവര്‍ സാലറി ചലഞ്ചില്‍ പങ്കാളികളാവാനും ലോട്ടറി എടുക്കാനും ജീവനക്കാരെ പ്രേരിപ്പിക്കുന്നു. കഴിഞ്ഞ ദിവസങ്ങളില്‍ ഓഫിസുകള്‍ സന്ദര്‍ശിച്ച ഇത്തരം സംഘങ്ങള്‍ താല്‍പര്യം പ്രകടിപ്പിക്കാത്ത ചിലരോട് സ്ഥലം മാറ്റമടക്കമുള്ള സൂചനകളുമായി ഭീഷണി സ്വരത്തില്‍ സംസാരിച്ചതായും പരാതി ഉയരുന്നുണ്ട്. സാലറി ചലഞ്ചിനോടു വിസമ്മതം പ്രകടിപ്പിച്ച ചില ഉദ്യോഗസ്ഥര്‍ക്കെതിരേ സ്ഥലംമാറ്റമടക്കമുള്ള പ്രതികാര നടപടികളുണ്ടായ സാഹചര്യത്തില്‍ ഭീഷണികളെക്കുറിച്ചു പരസ്യമായി പരാതിപ്പെടാന്‍ മറ്റു ജീവനക്കാര്‍ മടിക്കുകയാണ്.
പല കാര്യങ്ങള്‍ക്കുമായി നിരവധി സാധാരണക്കാര്‍ എത്തുന്ന ഓഫിസുകളില്‍ ജോലി ചെയ്യുന്നവര്‍ പോലും ഇതിനായി പോകുന്നുണ്ട്. ഇതുകാരണം പലയിടത്തും ദൈനംദിനപ്രവര്‍ത്തനങ്ങള്‍ക്കു തടസം നേരിടുന്നതായി പരാതിയുണ്ട്.
ഇവര്‍ ഭരണപക്ഷ സംഘടനകളുടെ പ്രവര്‍ത്തകര്‍ ആയതുകൊണ്ടും പോകുന്നതു പ്രളയ ദുരിതാശ്വാസവുമായി ബന്ധപ്പെട്ട കാര്യത്തിനായതിനാലും തടയാന്‍ മേലുദ്യോഗസ്ഥര്‍ മടിക്കുന്നതായും പറയപ്പെടുന്നു. ഓഫിസുകളിലെ ഇത്തരം 'മുങ്ങല്‍ വിദഗ്ധര്‍' കാരണം പല ആവശ്യങ്ങള്‍ക്കായി എത്തുന്ന സാധാരണക്കാരാണ് നിരാശരായി മടങ്ങേണ്ടി വരുന്നത്.