സാന്‍ ജുവാന്‍ (പോര്‍ട്ടോറിക്കോ): മുത്തച്ഛനോടൊപ്പം കളിക്കുന്നതിനിടെ പിടി വിട്ട് കപ്പലിന്റെ 11ാം നിലയിലെ ജനലില്‍ നിന്ന് വീണ ഒരു വയസ്സുകാരി തല്‍ക്ഷണം മരിച്ചു. റോയല്‍ കഹീബിയന്‍ കപ്പലായ ഫ്രീഡം ഓഫ് ദ സീസില്‍ ഞായറാഴ്ച ഉച്ചയോടെയാണ് സംഭവമെന്ന് പൊലിസ് പറഞ്ഞു.അവധിക്കാലം ആസ്വദിച്ച് ഇന്ത്യാനയിലെ ഗ്രാന്റ്ഗറില്‍ നിന്ന് യാത്ര ചെയ്യവേ ക്ലോ വിഗാന്‍ഡ് എന്നു പേരുള്ള കുഞ്ഞാണ് മരിച്ചത്.
മുത്തച്ഛന്‍ സാല്‍വറ്റോര്‍ അനല്ലോയുടെ കൈ പിടിച്ച് ജനലില്‍ ഇരുന്ന് കാഴ്ചകള്‍ കാണുന്നതിനിടെ മുത്തച്ഛന് ബാലന്‍സ് തെറ്റുകയും പിടി വിട്ട് കുഞ്ഞ് താഴോട്ടു വീഴുകയുമായിരുന്നുവെന്ന് തുറമുഖ വക്താവ് ജോസ് കാര്‍മോന പറഞ്ഞു. 3,600 യാത്രക്കാരുമായി പോവുന്ന കപ്പല്‍ പോര്‍ട്ടോറിക്കോ തലസ്ഥാനമായ സാന്‍ജുവാനില്‍ നങ്കൂരമിട്ടപ്പോഴായിരുന്നു അപകടം.
വെള്ളത്തിലേക്കല്ല, കല്ലു പാകിയ നിലത്തിലേക്കാണ് കുഞ്ഞ് വീണതെന്നു പൊലിസ് അറിയിച്ചു.