ഹൈദരാബാദ്: എല്‍ ആന്റ് ടി മെട്രോ റെയിലിന്റെ അമീര്‍പേട്ട് എല്‍.ബി നഗര്‍ മേഖല പൊതുജനങ്ങള്‍ക്കായി തുറന്നുകൊടുത്തു.
തെലുങ്കാനാ- ആന്ധ്രാ പ്രദേശ് ഗവര്‍ണര്‍ ഇ.എസ്.എല്‍ നരസിംഹന്‍ മെട്രോയുടെ പുതിയ റീച്ചിന്റെ ഉദ്ഘാടനം നിര്‍വഹിച്ചു. നഗരവികസന മന്ത്രി കെ.ടി രാമറാവു, ചീഫ് സെക്രട്ടറി ഡോ. എസ്.കെ ജോഷി തുടങ്ങിയവര്‍ പങ്കെടുത്തു.
മിയാപൂര്‍ എല്‍.ബി. നഗര്‍ (റെഡ്‌ലൈന്‍) കോറിഡോര്‍ ഒന്നിന്റെ ഭാഗമാണ് ഇപ്പോള്‍ കമ്മിഷന്‍ ചെയ്തിട്ടുള്ള 16 കിലോ മീറ്റര്‍ ദൂരം വരുന്ന പാളം. 16 സ്റ്റേഷനുകളാണ് ഇതിലുള്ളത്.
2017 നവംബറില്‍ പ്രവര്‍ത്തനമാരംഭിച്ച 30 കിലോമീറ്റര്‍ മിയാപൂര്‍- അമീര്‍പേട്ട് - നാഗോലെ സ്‌ട്രെച്ചിനു പുറമെയാണിത്. ഇതോടെ റെഡ്‌ലൈന്‍ കോറിഡോര്‍ ഒന്നിന്റെ നീളം 29 കിലോ മീറ്ററും 27 സ്റ്റേഷനുകളുമായി വര്‍ധിച്ചു. പഞ്ചഗുട്ട, ഇര്‍റുമന്‍സില്‍, ഖൈര്‍താബാദ്, ലക്ഡികാപൂള്‍, അസംബ്ലി, നമ്പള്ളി, ഗാന്ധിഭവന്‍, ഉസ്മാനിയ മെഡിക്കല്‍ കോളജ്, എം.ജി.ബി.എസ്, മലാക്‌പെട്ട്, ന്യൂമാര്‍ക്കറ്റ്, മൂസാരംബാഗ്, ദില്‍ഷുഖ് നഗര്‍, ചൈതന്യപുരി, വിക്‌ടോറിയ മെമ്മോറിയല്‍, എല്‍.ബി നഗര്‍ എന്നിവയാണ് പുതുതായി രൂപംകൊണ്ട സ്റ്റേഷനുകള്‍.
ലോകത്തെ പല മെട്രോകളിലും താന്‍ സഞ്ചരിച്ചിട്ടുണ്ടെങ്കിലും ഹൈദരാബാദ് മെട്രൊ സൗകര്യങ്ങള്‍കൊണ്ട് വേറിട്ടുനില്‍ക്കുന്നതായി ഗവര്‍ണര്‍ ഇ.എസ്.എല്‍ നരസിംഹന്‍ പറഞ്ഞു.