പുല്‍പ്പള്ളി: കേന്ദ്ര- കേരള സര്‍ക്കാരുകളുടെ കര്‍ഷകദ്രോഹ നയങ്ങളില്‍ പ്രതിഷേധിച്ച് വരുന്ന ലോക്‌സഭാ തെരഞ്ഞെടുപ്പില്‍ വോട്ടുകള്‍ ബഹിഷ്‌കരിച്ച് പ്രതിഷേധിക്കുമെന്ന് കര്‍ഷക സംരക്ഷണ സമിതി ഭാരവാഹികള്‍ പത്രസമ്മേളനത്തില്‍ അറിയിച്ചു.
ബാങ്കുകളുടെ സമ്മര്‍ദം മൂലം ഇനിയും കര്‍ഷകര്‍ ആത്മഹത്യ ചെയ്താല്‍ അതാത് ബാങ്കുകളുടെ മുമ്പില്‍ കര്‍ഷകന്റെ മൃതദേഹമെത്തിച്ച് പ്രതിഷേധിക്കുമെന്നും ജപ്തി നടപടികള്‍ തടയുമെന്നും ഭാരവാഹികള്‍ മുന്നറിയിപ്പ് നല്‍കി. വരള്‍ച്ചയും കാലവര്‍ഷക്കെടുതിയും വയനാട്ടിലെ കര്‍ഷകരെ ദുരിതത്തിലാക്കിയിരിക്കുകയാണ്.
വയനാടിനായി സര്‍ക്കാര്‍ ഒരുവര്‍ഷത്തേക്ക് മോറട്ടോറിയം പ്രഖ്യാപിച്ചെങ്കിലും ധനകാര്യ സ്ഥാപനങ്ങളുടെ ജപ്തിയും സര്‍ഫാസി ആക്ട് പ്രകാരം ഭൂമി പിടിച്ചെടുക്കുകയും തുടരുകയാണ്. കഴിഞ്ഞ രണ്ട് മാസത്തിനുള്ളില്‍ ജില്ലയില്‍ നാല് കര്‍ഷകര്‍ ആത്മഹത്യ ചെയ്തിട്ടുണ്ട്. ജീവിതം വഴിമുട്ടിയ അവസ്ഥയിലേക്ക് കര്‍ഷകര്‍ നീങ്ങുമ്പോള്‍ അവരെ സഹായിക്കാന്‍ സര്‍ക്കാര്‍ തയാറാവുന്നില്ല. പത്രസമ്മേളനത്തില്‍ ജില്ലാ ചെയര്‍മാന്‍ കെ. കുഞ്ഞിക്കണ്ണന്‍, കെ.കെ രാജന്‍, കെ.കെ കൃഷ്ണന്‍കുട്ടി, റഫീക്ക് പങ്കെടുത്തു.