വിനയന്‍ പിലിക്കോട്
ചെറുവത്തൂര്‍: ഒരു രാത്രിയില്‍ മലയാളമണ്ണിനെ മനസു കൊണ്ട് ശപിച്ചിരുന്നു ജുമാഖാന്‍ എന്ന ഉത്തരാഖണ്ഡുകാരനായ ലോറി ഡ്രൈവര്‍. എന്നാല്‍ ഒരു പകല്‍ കൊണ്ട് മലയാളി മനസുകളുടെ നന്മയറിഞ്ഞു അദ്ദേഹം. എറണാകുളത്തേക്ക് പുതിയ ലോറിയുടെ ചെയ്‌സുമായി ഉത്തരാഖണ്ഡില്‍നിന്നു പത്തുദിവസം മുന്‍പു പുറപ്പെട്ടതായിരുന്നു ഇദ്ദേഹം.
കനത്ത മഴ കാരണം യാത്ര തുടരാനാകാതെ വന്നപ്പോള്‍ കാസര്‍കോട് പിലിക്കോട് മട്ടലായി പെട്രോള്‍ പമ്പിനു മുന്നില്‍ വാഹനം നിര്‍ത്തിയിട്ട് അല്‍പമൊന്ന് മയങ്ങി. അര്‍ധരാത്രിയില്‍ ഉറങ്ങി പുലര്‍ച്ചയോടെ എഴുന്നേറ്റപ്പോഴേക്കും ഡിസ്‌ക് ഉള്‍പ്പെടെ നാല് ടയറുകള്‍ മോഷ്ടാക്കള്‍ കൊണ്ട് പോയി. ഇതിന്റെ വില ഏതാണ്ട് രണ്ടു ലക്ഷത്തോളം വരും. കമ്പനിയില്‍ വിവരം അറിയിച്ചപ്പോള്‍ കൊണ്ടുപോകുന്ന വാഹനത്തിന്റെ ഉത്തരവാദിത്തം താങ്കള്‍ക്ക് മാത്രമാണെന്ന മറുപടിയാണ് ലഭിച്ചത്.
ചെയ്‌സ് എറണാകുളത്ത് എത്തിച്ചാല്‍ കൂലിയായി കിട്ടുക 7500 രൂപ മാത്രം. എന്തു ചെയ്യണമെന്നറിയാതെ പകച്ചുനിന്ന ജുമാഖാന്റെ സങ്കടങ്ങള്‍ 'സുപ്രഭാതം' വാര്‍ത്തയായി.
സമൂഹമാധ്യമങ്ങളില്‍ ഉള്‍പ്പെടെ വാര്‍ത്ത പ്രചരിച്ചതോടെ അദ്ദേഹത്തെ സഹായിക്കാമെന്ന വാഗ്ദാനവുമായി നിരവധിപേരെത്തി.
സുപ്രഭാതം വാര്‍ത്ത വാട്‌സ് ആപ്പ് വഴി കമ്പനി അധികൃതരിലേക്ക് അയച്ചു നല്‍കി. ഇദ്ദേഹത്തിന്റെ സങ്കടം മനസിലാക്കിയപ്പോള്‍ ടയറുകളുടെ വില താങ്കളില്‍നിന്ന് ഈടാക്കില്ലെന്ന മറുപടി ലഭിച്ചു. ഇതോടെയാണ് മണിക്കൂറുകളോളം തീതിന്ന ജുമാഖാന്റെ മനസ് ആശ്വാസതീരമണിഞ്ഞത്.
കൂടെ ഉണ്ടായിരുന്ന മറ്റു രണ്ടു ചെയ്‌സുകളിലെ കരുതല്‍ ടയറുകള്‍ ഉറപ്പിച്ചു. പൊലിസ് സ്റ്റേഷനിലെ നടപടികള്‍ വേഗത്തിലാക്കാനും പ്രദേശത്തെ നന്മമനസുകള്‍ ഇടപെട്ടു.
ഇന്നലെ വൈകിട്ടോടെ എല്ലാവര്‍ക്കും നന്ദി പറഞ്ഞ് ജുമാഖാന്‍ യാത്രതുടര്‍ന്നു. യാത്ര തുടരാനൊരുങ്ങുമ്പോള്‍ അദ്ദേഹം പറഞ്ഞു ''കേരളം നന്മയുള്ള നാടാണ്. എന്നാല്‍ നന്മയില്ലാത്ത ചിലരുണ്ടെന്നു മാത്രം''.