കോഴിക്കോട് ആവേശം, സംഘര്‍ഷം
കോഴിക്കോട്: നാളെ വോട്ടെടുപ്പ് നടക്കുന്ന മലബാറിലെ നാല് ജില്ലകളില്‍ പരസ്യപ്രചാരണത്തിന് സമാപനം. കൊവിഡ് പശ്ചാത്തലത്തില്‍ പ്രഖ്യാപിച്ച നിയന്ത്രണങ്ങള്‍ കാറ്റില്‍പറത്തി കൊട്ടിക്കലാശത്തിന്റെ ആവേശത്തോടെയാണ് പ്രചാരണത്തിന് തിരശ്ശീല വീണത്. പലേടത്തും നേരിയ സംഘര്‍ഷമുണ്ടായെങ്കിലും പൊതുവെ സമാധാനപരമായാണ് പരസ്യപ്രചാരണം സമാപിച്ചത്. കൊട്ടിക്കലാശം പാടില്ലെന്ന് ജില്ലാ കലക്ടര്‍മാരുടെ വിലക്കുണ്ടായിട്ടും ഇതൊന്നും കാര്യമാക്കാതെ മത്സര ബുദ്ധിയോടെയാണ് മുന്നണി പ്രവര്‍ത്തകര്‍ സംഘടിച്ചെത്തിയത്. കോഴിക്കോട് കുറ്റിച്ചിറയില്‍ എല്‍.ഡി.എഫ്- യു.ഡി.എഫ് സംഘര്‍ഷമുണ്ടായി. പ്രചാരണ വാഹനങ്ങള്‍ ഒരേസ്ഥലത്ത് എത്തിയതോടെ പ്രവര്‍ത്തകര്‍ തമ്മില്‍ ഉന്തും തള്ളുമുണ്ടായി. ടൗണ്‍ പൊലിസെത്തി ഇരു വിഭാഗത്തെയും മാറ്റിയതോടെ സംഘര്‍ഷം അയഞ്ഞു.